U bah Bindo M Lanong, uba dei u myntri rangbah ba ar jong ka sorkar barim MUA, haba pynmih jingthoh mynta ka sngi, ula iathuh ba ka Inner Line Permit, ka dei ka ain, kaba la pyntreikam da ka sorkar Phareng na Bilat, ha u snem 1873, kaba mana ia ki briew kiba shong nabar jong ki District ba kynthup ia ka Kamrpud, Darrang, Nonggong, Sibsagar, Lakhimpur, Cachar, Naga hills, KJ Hills bad Garo Hills (ba la weng noh pat ha u snem 1897), ba kin leit rung sha u pud u sam jong kitei ki District, khlem da shim ia ka Inner Line Permit.
“Tang ita ym don eiei palat nangta. Ka long thik kumba thied tiket ban leit peitkai cinema ne shong rel shong erplein” ong utei u rangbah.
La ong shuh da utei u rangbah “Mano ba khie khohreh ILP san bnai, shwa ka elekshon MLA, ym dei u myntri rangbah, U Dr Mukul Sangma hi?” Ma u, uba la thung ia ka High Level Committee (HLC), ha ka 4tarik Nailur 2012, ha kaba la jied ianga kum u chairman ka HLC, 4ngut ki Minister RC Laloo, HDR Lyngdoh, P Tynsong bad Kong Ampareen Lyngdoh. Sa lai ngut ki MLA, Bah Ardent Basaiawmoit, Metbah Lyngdoh, Bah L Rymbai bad nangta sa 3ngut ki CEM District Council, 3ngut ki khlieh nongsynshar, 3ngut na ki civil society bad 3ngut na kawei kawei ka Seng Bhalang, ia kaba la jied hi da U Dr Mukul.
Ong shuh katei ka jingthoh “Lait noh iwei I Minister Longkmie, iba la shim bynta lang bad kyrshan ia ka ILP, kumba dawa ki Sengbhalang, 3ngut kiwei pat ki Minister, kim shym pyrshah ia ka ILP, namar ki shu shong khlem krein eiei” ong ka kyrwoh, ba la pynmih mynta ka Sngi.
La ong shuh U bah Bindo, ba don ki stad kiba batai ba ka ILP, kan pynhiar ia ka roi ka par, ia ka shang kai pyrthei bad don pat kiba batai ba ka long kum ka jingban bein ia ki mynder ri bad don kiba ong ba dei ka ain phareng bad kumta kam trei kam shuh mynta.
“Kaba pynkyndit ruh ba ki don ki dorbar kiba hapoh kata ka Synjuk kiba khraw – Grand Council jong I bah John Kharshiing, kiba ieng pyrshah ia ka ILP, namar ka ktah ia ka hok ki mydner bad ka ktah ia ka kam shangkai pyrthei” ong ka kyrwoh.
“Don pat kito kiba ioh mluh na ka sorkar, ha ki jingiadei politik ne business, kiba ieng matlah ha tyngkhap ka sorkar, kito pat kiba ia kamai trok sha Jaintia Hills, kiba sngew ba ka ILP kam wan rah jingbha ia ki bad kumta ter ter. Ka MTDF pat ka la pynsangeh syndon ia ka lehkmen syunrai, kaba ju pynlong man la u snem ha Umiam, namar kajuh ka daw, ka iakhih ILP” ong U bah Lanong.
Phi don ban ong eiei?