Ka ILP ka long ban tip ïa ka rung ka mih kiba nabar, ong ka KHNAM

Shillong:Ka Khun Hynñiewtrep National Awakening Movement (KHNAM), Youth Wing ka kyrshan ïa ki sengbhalang ban pyrshah ïa u Myntri Rangbah ka jylla haba ïadei bad ka lynti Rel, bad ong ba kan ïai pyrshah ïa kino kino ki projek ba ïadei bad ka Rel lada ym pat lah pynrung pyntreikam ka Inner Line Permit (ILP) ha Meghalaya.

Halor katei, na ka liang u President jong ka KHNAM Youth Wing Bah Thomas Passah u la ong ba ka seng kan ïai pyrshah beit ïa katei ka projek bad na ka liang u Myntri Rangbah ka jylla u Conrad Sangma udei ban rah ïa katei ka jingsngew ki nongshong shnong ka jylla sha Delhi.

“Ngi kwah banjur ba ka Inner Line Permit kam dei ban pynsangeh ïano ïano ban wan rung, ban sah bad ïaid lyngba ka jylla hynrei ka dei tang ban shu tip ïa ka rung ka mih kiba nabar,” ong u Bah Thomas.
“Ngi kwah ban pynpaw da kaba shai ba ngi pyrshah ïa ka jingwan ka Rel la ka dei kaba kit tiar ne kaba kit briew tat haduh ba la pyntreikam ïa ka ILP kaba dei ruh kaba la rai lang da ki nongmihkhmat hapoh Ïing Dorbar Thawaiñ ka jylla,” bynrap ka KHNAM.