Ka ILP ka biang bha ha Meghalaya, kham shem jingeh ha Assam, ong u Anup Chetia

Shillong: U nongialam barim ka seng lehnoh ULFA u Anup Chetia u la ong ba ka Inner Line Permit (ILP) ka biang bha ban pyntreikam ha Meghalaya kumba treikam ha kiwei ki jylla ka dong mihngi hynrei kan kham shem jingeh ha Assam namar ki don ki daw.

                Haba kren mynta ka sngi sha ki lad pathai khubor hadien ba la iakynduh ia u Conrad K Sangma ha Shillong, u Anup Chetia uba long ruh u chairman ka North East Indigenous People Forum (NEIPF) ba la don lang ka FKJGP, RBYF, HNYF, u la ong, “Ngim pat iakren ia ka ILP namar ba dang don ki jingeh ha Assam, hynrei nga sngew ba ha Meghalaya lah ban pyntreikam da kaba suk bad ka jylla ka dei ban shim kabu ia kane”.

                U la ong ba lada lah, ka ILP ka dei ruh ban treikam wat ha Assam. U Chetia u la ong ba kane ka seng kan ieng ban iada ia ki riewlum ban pyrshah ia ka Citizenship Amendment Bill 2016  namar ba kan pynjah klep ia ki riewlum lada wan tuid ki briew nabar. “Ngi ieng ban iada ia ka jinglong kyrpang jong ki paidbah riewlum ka dong mihngi bad ngin pyrshah ia ka CAB”, u la ong.

                U la iathuh ba mynta ka sngi, ki la thaw ruh ia ka tnad NEIPF ha Meghalaya ha kaba un ialam da u bah Willbirth Rani uba dei u president ka FKJGP.

                Ula iathuh ba ka jingwan iakynduh jong ki, ia u myntri rangbah ka Meghalaya u Conrad K Sangma ka long ban ai khublei ia ka jingshim khia jong u ban iasaid tyngeh ban pyrshah ia ka Citizenship Amendment Bill 2016 ba la wanrah ka sorkar pdeng namar ba kan pynjah lut ia ki trai shnong riewlum ha kane ka dong mihngi.

                “Ngi la wan ai khublei ia u Myntri Rangbah ka Meghalaya uba la shim khia ban pyrshah ia ka CAB watla u don lang ha ka kynhun jong ka sorkar NDA ba ialam ka BJP”, la ong u Chetia bad bynrap.

                U la ong ba donkam ia u Conrad kum u nongialam ka dong mihngi ym tang jong ka Meghalaya.

                U la ong ba lada ka sorkar pdeng kan iaid shakhmat ia ka CAB, ka seng lem bad ki paidbah ka dong mihngi in iakhun tyngeh pyrshah ia ka.

                Ha kawei ka liang, u nongialam ka FKJGP u bah Dundee Khongsit uba don lang, u la ong ba ka NEIPF u la ong ba kane ka seng kan ieng na ka bynta ban wanrah ka jingiatylli jong baroh ki riewlum jong kane ka dong mihngi ban pyrshah ia kino kino ki ishu kiba ktah kum ka CAB, ka jingwanrah ia ka AFSPA bad kiwei.