Ka ILP ha ka Jylla

Bah RM Shabong

Ka jing wan jong ka ain CAB ha ka Ri, ka la pynkyndit bynriew (imat) ia kiba bun na ki nongialam sain pyrthei, ki nongialam seng bhalang bad ki riew paidbah ruh bad ka daw ka long ba ki sngew thikna ba kan mih sa kawei pat ka Umpling, kaba kin wan tuid bad jyllei da ki briew kiba nabar ban buhai shnong.

Ha ka jing pynbor jong ki seng bhalang, la iohi ba kane ka sorkar Jylla, ha ka jing ialam jong U Conrad Sangma, ka la leh ia kaba bha tam bad kata ka long ba ha ka sien ba nyngkong, ngi iohi, ba ka sorkar Jylla, kan leit sha Delhi, ban dawa ia ka inner line permit (ilp), ka bym ju don ba dawa baroh shi jingim jong ka Meghalaya bad kam dei tang katta, ka wan ruh ka mat kaba kham sngew tynnad shuh bad kata ka long ba ki nongialam ka kynhun MDA, ki la rai ban khot ia ka dorbar ba kyrpang, ban shim ra bad dawa ia ka ain ILP na ka sorkar India bad ban pyntrei kam ha ka Jylla Meghalaya baroh kawei.

Mynta ki don kiba nion ia U Conrad Sangma bad ia ka Agatha, hynrei ngi dei ban sngewthuh ba ka ain MRSSA, kam dei kaba thaw da U Sangma thymmai, hynrei une lei uba mynta, ula nang pynbha ia ka ain jong U Sangma barim (U Mukul Sangma) bad haba ka la don ka ain kaba la dep thaw, ka dei ka kamram jong ka sorkar Jylla ban pynurlong bad ban pyntreikam bad katei ka leit jia ia kane ka sorkar jong U Sangma thymmai.
Hap ban ong, ba une ruh um shym peit jngai, ba u shu pdiang ia ki ain jong U Sangma barim, wat la ula dei ban sngewthuh ia ka jingkwah jong u paidlang ka Jylla, ban ai da ka inner line permit (ilp), hynrei hangta ruh kam dei kaba suk, lada jia ba kam don ka jing kyrshan jong uba bun balang, namar ba ka ilp, ka dei ka ain, ka ban mynjur da ka Parliament bad ka ban soi da U President ka Ri India, kumba ka dang shu jia ha ki sngi ba ladep ha Manipur.

Ha ki khyndiat taiew ba ladep, haba ka sorkar Jylla, ka thmu ban teh pynskhem ia ka ain MRSSA, la iohi, ba ki la mih ki jing wohnia bad ki jing pyrshah ba har rukom, namar ba ka thmu ban khanglad ia ka jingwan laitluid ki bar Jylla bad wat U Lat ruh, um pdiang satia ia ka jingai jingmut jong ka sorkar Jylla bad katei ka dei ka mat, kaba ki briew kiba na Ri Thor, kin thaw lad ban thaw dieng pyngkiang ia ki ain jong ka Meghalaya, namar ba hadien ba la khang ba kin iaid mon sha Nagaland, Mizoram, Manipur, Arunachal bad kumta ki iohi, ba kan dei tang ha ka Meghalaya ka paradais ka jongki.