Ka Iew Step ba shipor ha Madan Mawspeng

Nongpoh:Myn hynnin ka step ha ka por 7 baje mynstep, la plie ia ka Iew Step kaba don ha Madan Mawspeng kaba don ha Mawroh, Ri Bhoi. Ka jingplie ia katei ka Iew Step ba shipor ka dei hadien ba la pynkynriah noh ia ka Iew Step kaba la ju long baroh shikatta ha C.T Memorial Hat Nongpoh na Nongpoh.

Kiba la donlang ha katei ka sngi, ki kynthup ia ka Kong RM Kurbah, Deputy Commissioner ka Ri Bhoi, kum ka kongsan, nangta u Paiem W.Syiem Nongshai, Sordar Nongpoh Sirdarship Elaka, u Bah CB Syiem, Chairman ka NTC, u Bah Rayonald Kharkamni, Secretary NTC, u Bah O.Lyngdoh, Rangbah shnong ka shnong Mawroh, ki rangbah shnong ka thain lem bad ki nongdie nongthied kiba la wan sha katei ka Iew Step kaba thymmai.
Ka nongrim kaba la pynlong ban plie ia katei ka Iew Step na CT Hat sha Madan Mawspeng, ka dei hadien ba katei ka Iew CT hat Memorial, ka la khapngiah shaba palat bad la shem jingeh ban pyndonkam ia kata ka Social Distancing ne ka jingiajngai uwei na uwei pat.

Lyngba ka jingplie ia katei ka Iew Step ba thymmai, ka la long shisha ka jingkyrkhu na bynta kito ki nongrep kiba pynmih ia ki mar rep mar riang, namar lyngba katei ka Iew kin sa ioh ban die ia ki mar rep ki mar riang ki jong ki.