KA ÏALUR SAMLA U KHASI HYNDAI

Sphondar Thongni

U Khasi hyndai haba u la biang karta u la dei por ban leit ïing lok u Shang na kawei ka shnong sha kawei pat ka shnong ban leit wad khyllot kylleng ki shnong kiba marjan bad sha jngai ruh u pynlut la ka por ban leit thiah khynraw ha kano kano ka ïing ba don kynthei samla u pynlut da ki bnai da ki snem ruh.

Haba u poi ha ïing jong kiba don khun kynthei u shong u thiah hangta bad ka put ka tem ka rwai ka phawer.Ki kmie ki kpa ruh ki ailad ïa ki khun ba kin ïashong bad kita ki khynraw ki ai ka jaka ki ai jaka thiah ïa ki.Lada ki khun kynthei na kata ka ïing ki imon ïa uta u samla kita ki khyllot ruh ki pynlut por ban shong ban sngap ïa kita ki sur phawer bad ban ïa shong miet bad ki, hynrei da kim mon pat ki leit thiah noh dang kloi.Kita khynraw ruh lada ki la sngewthuh ba kita ki samla Kim mon kim wan thiah shuh ki leit noh sha kiwei pat ki ïing ba don khun kynthei.

Lada ki sngewthuh ba kito ki samla na kato ka longïing ki la imon ïa uta Samla ba wan thiah khynraw.kito ki khynraw ki wan ïathuh ha kiba ha ïing ban jied ïa u ksiang uban leit ïa kynduh ïa kato samla u ksiang u lah ban dei u kñi ne uno uno u riew rangbah uba ki shaniah.Uto u ksiang na ka ïing u shynrang haba u leit ban ïa kren bad kiba ha ïing kato ka samla u pynsngew pynkren mar khmat ki kmie kpa jong ka kynthei nangta da ki la ïamon baroh arngut ki sa pynbeit ka por ban pynïateh Ktien ha kaba uto u ksiang un long u nongïalam lynti uban hap ruh ban shim ïa ka jingbah khlieh na bynta jong u shynrang. Kumjuh ruh na ka liang ka ïing jong ka kynthei ruh ki hap jied uwei u rangbah uban long u ksiang uba shim ka jingbah khlieh na bynta jong kato ka kynthei.

Don ruh ha ki katto katne ki jaka kiba pyndonkam da ka kata pyrla ne ka pernu ba ki thaiñ da u siej ban phah khyrwoh sha ka kynthei kum ka dak ban phah kylli samla khamtam ha ki thaiñ riwar ki pyndonkam da kane ka buit.Kito ki bym nang ruh ki hap phah thaiñ ha ki tymmen kiba nang.Lada ka kynthei ka pdiang ïa kata ka pyrla ne ka pernu ka shim bad pdiang ïa kata ka pyrla ne pyrnu hynrei da kam treh te kam pdiang ïa kata pyrla ne pyrnu..