Shillong:U bah Prestone Tynsong u symbud Myntri rangbah ka jylla, u la kren shai ba ka jingwanrah ka Sor kar ia ka Gaming Act, ka dei ban buh kyndon ia ki kam khalai kiba la don lypa ha ka jylla, ym ban wanrah ia ka Casino ha ka jylla.
Haba kren bad ki lad pathai khubor, na ka liang u bah Tynsong, u la ong “Ka don ka jingdawa, na ki katto katne ki seng bhalang ha kaba ia dei bad ka jing pyndam noh ia ka Gambling Regulation Act, hynrei haba ki kren halor ka kam khalai ka thew ia ka tim, ka iadur masi, ka khwai dohkha bad ka jackpot “.
U la bynrap “Ha kine ki snem ba la dep ngim don ka rule ban buh kyndon da ki bor ba dei peit bad mynta ngi donkam ban buh ia kine ki rule”.
“Ki briew kiba don bynta ki shimkhia tang ia ka mat Casino, hynrei ki khlem kren halor ka khalai kaba la don lypa bad na kane ka daw, ba na ka liang u Myntri rangbah ka jylla u la jubab ban sangeh shwa ban ai laisen bad ngin hap ban ia kren bha shwa ia baroh bad lada kim treh lane kin treh ban pdiang ia ka Casino ha ka jylla bad lada ngi kren halor ka khajna ka casino, ka donkam, hynrei ngin hap burom ia ka jingsngew ki paidbah”u la ong.
“Lada ngi pyndam ia ka Gaming Act kan mut ba baroh kine ki kam khalai kiba la don lypa kin long beain, kumta ngi donkam ba kan don ka Act bad ka jingpyrshah ia ka casino ym ia kiwei kiwei ki kam khalai ha ka jylla dei na kane ka daw ba ngi la wanrah ia ka ain ban buh kyndon halor kine”u la ong.
Haba kylli halor ka jingkynnoh ba ka rai ban buh ia ka Gaming Act, ka dei ka ba la leh lyndet na ka kynhun myntri u bah Tynsong, u la ong “Kam shym la don kane kano ka jingleh lyndet ia ki kynhun myntri, namar ba haba pdiang ia ka Gaming Act, ngi la pdiang ia ka ordinance, ngi pdiang ia ka Bill bad ngi regularise sha ka bill bad ka kylla sha ka Act bad ngi la pynkhreh ia ki rule bad kine ki rule ruh la pdiang da ki kynhun myntri baroh”.
“Ka Gaming act kaba la kynthup ia ka regulation ia ki kam khalai kiba kynthup ia ka Casino, haba ia dei bad ki laisen kan sa iap hi, hynrei, hadien ba la pdiang ia ka rule ka la don ka jingpyrshah na baroh ki liang bad ngi la rai ban pynsangeh noh haduh mynta”u la ong.
Mda government dei nonglehdonbor iabaroh ki jaitkam khlem da peit ia jinglong paitbah ,kumta kadei sorkar leh donbor