Ka ia u Mynsiem

AIS Suja

Hangne ngi iakren ia ka ia u Mynsiem bad uta u Mynsiem u dei u Mynsiem Bakhuid jong u Blei, (Holy Spirit). Ka ia u Kpa ka la leit noh mynba u la kren da lade ha ki briew jong u ki Israel. Naduh kaba sdang hi u Blei u la kren da lade ha u Adam nyngkong da kaba ong – ko Adam Me don haei? U Adam u ong- Nga la iohsngew ia ka jingsawa jong me ha ka kper, nga te nga la sheptieng. Genesis 1:9. U Blei u la kren ruh ha u Moses – “Ko Moses, to ieng to leit noh nangne ma me bad uta u paidlang ia uba me la wallam na Ri Egypt. Exodus 33:1. U Blei ruh u la kren ha kiba bun da lade hi kum ha Abraham, Genesis 18:16-33. Haba u Blei u kren, ka wan ka eriong u pyrthat, ka leilieh, na kata ka daw, ki khun Israel ki sheptieng, ki la ong ha u Moses- “To kren ma me ha ngi, te ngin sngap: wat ai ba u Blei un kren IOH NGI IAP” Exodus 20:19.

Kumta, hadien ka ia u Kpa ka wan ka ia (age) u khun (Jisu Khrist). Ka ia u khun u Blei, u la wan da lade sha kane ka pyrthei. Ka ktien u Blei ka ong – Ba u dei u KTIEN (WORD). Uta u ktien u la long u Blei, u la don ha kaba Myn nyngkong bad u Blei … u la long ha ka pyrthei, ka pyrthei ka la long da U, pynban ka pyrthei kam ithuh ia u” Ioanis 1:1-11. “Uta uta u ktien te u la kynja doh (The Word became flesh)” Ioanis 1:14. U ktien u dei u Jisu Khrist kein, uba la wan ha ka jinglongdoh (born in flesh).

Ka ia jong u khun ka la iaid ba kut noh haba u Jisu u la pyndep ia kiei kiei baroh halor Diengphna da kaba ong – “La pyndep (it is finished). Ioanis 19:30. Te ha shwa ba u khun (Jisu) un pyndp ia kiei kiei baroh, u la kren lypa da kaba ong “Ka myntoi ia phi BA NGAN LEIT NOH: Namar lada nga ngam leit noh uta u nongpyntngen un nym wan ha phi: Hynrei lada nga leit noh, NGAN PHAH IA U HA PHI. Te ynda wan ma u, un pynkynduh ia ka pyrthei shaphang ka pop bad ka Hok bad shaphang ka Jingbishar de” Ioanis 16:7-8. Shisha, hadien ka jingmihpat, u Jisu u la kiew noh sha bneng ha u lyoh. “Te katba ki (synran) ki dang khmih shain sha bneng, katba u dang kiew, arngut ki rangbah (angel) ki la wan hajan jong ki kiba kup ki jain balieh, ki la ong – ko rangbah Galilaia, balei phi ieng khmied sha bneng? Une u Jisu uba la shim noh sha bneng, un wan ha kajuh ka rukom kumba u kiew sha bneng” Ki kam ki Apostol 1:10-11.

Kumta, haba la dap 50 sngi, ha ka sngi Pentecost, u Mynsiem Bakhuid u la hiar, “Te kyndit kyndit ka jingsawa na bneng kum ka lyer ba beh kyrthep la pyndap ia ka iing baroh kawei kaba ki iashong, la paw ki thylliej ba pait pnat kum ka ding kaba la shong ha uwei pa uwei na ki, la pyndap ia ki da u Mynsiem Bakhuid, ki la kren ha ki thylliej kat kumba u Mynsiem u ai bor ia ki ban kren” Ki kam Apostol 2:1-4.

Kaei kaba ngi don ban ong hangne, ka long, ba naduh kato ka por haduh mynta ka dang, dei ka ia (age) u Mynsiem Bakhuid. U Mynsiem Bakhuid u dang trei haduh mynta ha ki bun rukom. Namar kata- “Wat pynlip ia u Mynsiem, wat niew bein ia ki jingiathuhlypa” 1 Thessoloni 5:20-21. To wat pynsngewsih ia u Mynsiem Bakhuid u Blei da uba la shonshap ha phi haduh kata ka sngi, ka jingsiewspah” Ephesos 4:30
Mynta hi ka dang long ka ia u Mynsiem Bakhuid. U Mynsiem u Blei u dang pynkynduh ia ki briew baroh shaphang ka pop ka hok bad ka jingbishar de. Ioanis 15:7-8. Ha kylleng pyrthei u Mynsiem u dang trei kumba ki um ki tap ia ka duriaw (All over the world the Spirit is moving like the water covered the seas).
Lada don ba ong ba ka ia u Mynsiem ka la kut, ka long kaba bakla. Namar yn sa pynkut noh ia ka ia u Mynsiem ha shwa ka jingsynshar u Mradkhlaw ne uta u 666. Kata tang shu wan ka jingmihpat bad jingrongnoh. Dei hangta kein kan jia kaba kut bad ka jingkut jong ka jingsdang pat ia ka pyrthei thymmai (Ngan sa batai ia kata).

Te ia mynta hi, u Blei u leh kum bym khmied ia ki aoim ka jingbymtip, hynrei mynta u hukum ia ki briew baroh kylleng la kylleng BAN KYLLA KABA MUT (to repent) Ki kam ki Apostol 17:30-31. U Blei u ong – “U Mynsiem jong nga, un ym ialeh bad u briew junom” Genesis 5:3. Ka mut ba ka ia u Mynsiem Bakhuid ruh kan sa kut noh.
Amen.