Ka HSPDP kam beh ia u bah Morning & bah LG Nongsiej

Nongstoiñ, 28 Jymmang:
Ka party HSPDP kadei ka seng kaba la rim bha, ka ban sa kynjoh 50 snem ha u snem 2018, bad katba ka seng, ka dang pynkhreh ban rakhe ia ka jingdap 50 snem, kynsan ka seng, ka la sdang ban kiew sted bha ha kaba kiba bun ki la sdang ban phai khmat sha ka seng, ym tang hapoh West Khasi Hills hynrei ka HSPDP kala sdang bah suhthied bha ruh hapoh ki bynta jong ka East Khasi Hills, ka la sdang ruh ban khlie lung khie im sha ki thain Ribhoi bad sha ki thain Jowai.
Ha kaba iadei pat bad ka jingong ba ka seng HSPDP, ka la beh noh ia u MDC ka thain u bah Morning Mawsor bad ia u MDC ka Nongstoin u bah L.G. Nongsiej, na ka liang jong u bah Ardent Miller Basaiawmoit haba kren ha ka jingialang bah ha Mawthengkut u la ong ba ha ka jingshisha ka seng HSPDP ka khlem beh ia u bah Morning Mawsor na ka seng, hynrei ka kwah ban pyniaid beit iaid ryntih ia ka seng, ha ka rukom kaba itynnad, namar ka jingleit ban pyniasoh jong ki ar ngut ki MDC sha ka PDF khlem ka jingtip jong ka seng, ka long kum ka jingialeh pyrshah bad na ka liang jong ka seng, ka la pynsngewthuh ia ki, hynrei kim shym sngap bad ki la ong ba ki la jied hi noh ban mih na ka seng.
U bah Ardent u la kren ruh shaphang ka Langpih bad u la ong ba mano bala pynkhih bad pynklumar jingmut ia ka thain Langpih mynta naduh ba la pynmih bad pynkhie im biang ia ka Hima Nongmynsaw kaba la leit noh naduh ki spah tylli ki snem, naduh ba la iap katei ka Hima Nongmynsaw hadien ba ym don nongpeit nongkhmih shuh u (L) Maieid Hoping Stone Lyngdoh u la bthah ia u Syiem jong ka HimaRambrai ban peit ia katei ka thain bad ha ka snem 1984 u Syiem ka Hima Rambrai u la ithuh ban pyniasoh ia ka Raidmynsaw kaba la tip ruh kum ka Hima Raidmynsaw Rambrai Syiemship, ha kaba ula ong ba ka dei ka kynhun PDF, kaba ialam ha District Council, kaba pynim iaka Hima Nongmynsaw.
Hynrei ha u snem 1985 la die noh ia katei ka Hima Raidmynsaw sha u briew shimet, hynrei da ka jingiakhun bad ia said jong ki paidbah ym shymla lah bad haduh ka jingpeit jingkhmih jong ka Hima Rambrai katei ka Raidmynsaw ka la ioh haduh lai ngut ki myntri bad u ba khatduh haduh mynta u dei u bah Hindro Samakha u ba long u Sirdar bala ithuh da ka District Concil ha u snem 2000 bad ha ka snem 2009 la thung ia u kum u sirdar bad kumjuh ha u 2015 da ka jingjied biang jong ki paidbah ka thain, bad dei u bah Hindro samakha bad ki paidbah ka thain kiba la iada ia ka Langpih ban dang neh ha ka Jylla Meghalaya haduh mynta.