Ka Hospital ia ki longkmie ba ar met ha Umsning, ong U Mukul

Nongpoh, 11 Jymmang:
Kan long ka khubor ka ban pynkmen ym tang ia ki paid nongshong shnong ka thain Umsning, hynrei ia ki paidbah ha ka Distrik hi baroh kawei, ha kaba hynnin ka sngi plie ia u Mawnongrim ban shna ia ka Karkhana pynmih Slasha kaba la tip kum ka (Organic Tea Processing Unit) u Myntri Rangbah ka Jylla u Dr, Mukul Sangma, u la pynbna paidbah ba shen ka sorkar, kan sa plie ia u Mawnongrim na ka bynta ban tei ia ka Hospital ba 50 jingthiah ha Umsning, ka ban ai ka jingsumar kyrpang tang ia ki Longkmie ba armet bad khynnah.
Haba kren ha katei ka sngi, u Dr Mukul Sangma, u la ong ba ka sorkar nalor katei ka jingthmu ban plie noh ia u Mawnongrim ban shna ia katei ka Maternity& Child Hospital ha Umsning, hynrei ka sorkar ka dang wad ruh ia ki lad ki lynti ban tei sa ia ka Medical College ha ri Bhoi.
Kumta lada jia ba kitei ki kyntien ia kaba la pynmih da u Myntri Rangbah kin urlong, khamtam eh haba iadei bad ka Medical College, kan long shisha ka jingkyrkhu kaba khraw ym tang ia ka Dong Ri Bhoi, hynrei ha ka jylla hi baroh kawei.