Ka Hospital ha Mawhati, kaba khlem bording bad umbam umdih

Nongpoh: Ka jingshah iehnoh bein ia ka Mawhati PHC, kam shem la wanrah jingeh tang ia ki paidbah, kiba la leit ban ban shah sumar ha katei ka PHC, hynrei wat ki nongpeit bad kiba dei ki nongsumar ia ki nongpang, ki mad ia kajuh ka jingeh, namar ka jingduna hapoh katei ka Hospital paidbah bad kata ka long naduh ka jingbym biang ka umbam umdih, ka bording lem bad kiwei kiwei ki jingdonkam.
La sakhi ia ka jingduna ha katei ka PHC, ka dei hynne ka sngi ha ka por ba ki dkhot ka HYC, ki la leit ban jurip ia katei ka PHC, ha kaba la lap ba katei ka jaka sumar, ka don hapdeng shibun ki jingduna bad ka bym lah shisha ban ai ia kata ka jingshakri kaba janai ia ki paidbah kiba don ha katei ka thain.
Ki nongtrei kiba don hapoh katei ka PHC, ki la iathuh ba mynta la ar bnai kynthih ym shem la don bording lane ka um ha katei ka jaka sumar. Ki la ong ruh ba kane ka jingbym don um bad bording, ka la pynjynjar shikatdei eh ia ki, namar ki shem shitom ban trei ha ka por mynmiet bad khamtam eh halor ka jingbymdon um, ka la pynthut eh ia ki wat haba iadei bad ban sumar ia ki nongpang, kiba wan ban shah sumar ha katei ka jaka.
Ki la iathuh ruh, ba ki don ki khep kaba ki hap ban ialum synniang na ki paidbah, na ka bynta ban pynmih pisa bad na katei ka pisa ki sa ioh ban ainong sha ki briew ba kin wan pynpoi um sha katei ka PHC.
Katba na ka liang ka HYC, lyngba u Bah Hercules Suting, General Secretary ha Ri Bhoi, ha ryngkat ki dkhot na ka Mawhati Circle, ki la pynrem jur ia sorkar jylla bad khamtam ia ka tnat ka koit ka khiah, namar ka jingbymshimkhia ha ka ban wanrah ia ka bit ka biang hapoh katei ka PHC.
Kum ka seng, ka sngewlyngoh ban tip ba kane ka PHC kaba ai jingshakri ia ki palat 42 tylli ki shnong, hynrei ka dang iakynduh ia kiba kum kine ki jingeh, ha kaba kane hi ka la pynpaw ba ka sorkar kam shimkhia ia ka jingeh kaba la iakynduh da ki paidbah ha ki shnong nongkyndong.
Namarkata, halor ka jingduna ha kane ka jaka sumar, kaba kynthup naduh ka jingbymdon bording, ka umbam umdih bad ka jingbym don u Doktor (MBBS), kaba la pynshem jingeh ia ki paidbah kiba la leit ban shah sumar, ka seng kan sa leit ban pynsngew sha ki bor bahalor ne wat sha u Myntri ba deipeit ia ka koit ka khiah, khnang ba kin shimkhia ban pynbiang ia katei ka jaka sumar, kaba la sakhi ia bun phew tylli ki shnong ha katei ka thain, u la bynrap.