Shillong 07 Lber: kum shibynta ban ban rakhe ia ka sngi jong ki kynthei lane ka International Women’s Day ha ka 7 tarik u Lber 2025, ka Synod College, Shillong, lyngba ka Women’s Cell bad ka Historical Research Synod, mynta ka 7 tarik Lber 2025, ka la ioh ban bniah ha kaba iadei bad ki Satellite bad ruh ban pyllait paidbah ïa ka kot kaba la ai kyrteng ” Women Pathfinders of Meghalaya ” kaba la thoh da u Dr. David Arnold Kharchandy.
Ia kane ka kot la ioh ban pyllait paidbah da u MP ka Shillong Parliamentary Seat u Dr. Ricky AJ Syngkon, uba long u kongsan ha ka jingiadonlang ki khynnah pule, ki nonghikai, ki ba shah khot sngewbha, ka ba la pynlong ha Synod college, Shillong.
Kumjuh ruh ha kane ka sngi la ia donlang da i Dr. Jenita Mary Nongkynrih kaba dei ka khlieh jong ka Urban and Regional Planning Division (URD), North Eastern Space Applications Centre, ka Sorkar India, Umiam, Department of Space.
u Dr. David Arnold Kharchandy uba dei u Assistant Professor ha ka tnat History bad u Secretary jong ka Centre for History Research ha Synod College, Shillong, u la batai lyngkot halor ka kot kaba u la thoh, da ka ba U la pynpaw ïa ka jingkordor jong ka, da kaba batai bniah kumno kane ka kot ka kynthup ïa ki 27 tylli ki lynnong bad 361 sla kiba la aiti ban buh jingthoh ïa ka jingim bad ki jingnoh synniang jong ki kynthei nongsdang kum ka Rose Milan Bathew Kharbuli, ka Silbi Passah, ka Reebecca Suchiang, ka Holibon Marbaniang, ka Sweetymon Rynjah, ka Trinity saioo bad bun kiwei pat. Ka jingtrei kaba ktah jong ki ha ka jingsynshar, ka pule puthi, ka jingïakhih ha ka imlang sahlang, bad ka jingseng kam seng jam ka la buh ïa ki nongrim kiba thymmai na ka bynta ka jingkiew bad ka jinglong nongïalam.
Na ka liang u Dr. Ricky Syngkon pat haba ai jingkren u la ai mynsiem, da kaba kubur ia ka bynta ba kordor jong ki kynthei ha ka roi ka par jong ka jylla Meghalaya bad ban jur ruh ia ka jingdonkam ban iai bteng ban iasaid na ka bynta ban pynkupbor ia ki kynthei bad ban long ki nongialam.
U Dr. Ricky Syngkon ula ong ruh, ba ka hok jong ki kynthei kadei ban long mar kumjuh khnang ban kan shngain ha kaba iadei bad ka imlang ka sahlang. Ula ong ba kane ka kot kalong ka ba donkam haduh katta katta ban pule ia ka, khamtam eh, ka ba batai shaphang ka jingkordor jong ki kynthei hapoh ka jylla Meghalaya.
Ki kynthei ki don byntalang ha ki kam bapher bapher kum ki scientist, ki riewsain hima, ki nongialehkai sports bad kiwei kiwei de, Nalor kata u la ong ruh, ba hap ban shim ia kane ka sngi kum ka sngi ba kordor jong ki kynthei ki badei ban long mar kumjuh bad ban pyntikna ia ka jinglong shngain ha ka imlang ka sahlang.
Phi don ban ong eiei?