Halor ka khubor kaba ong: “Artaiew ai por ka SKHHN ia u Syiem Nobosohphoh ban pynbeit ia ki kynrum kynram Hima Nobosohphoh”, ka Executive Dorbar u Syiem ka Hima Nobosohphoh ka pynshai ba ka Ka Hima Nobosohphoh ka long kawei na ki Hima Khasi kiba la rim tam hapoh u Hynniew Trep Hynniew skum bad ka dei ka hima baduk tam lada khein ia ka ioh ka kot bad ki jaid jingmih ha ka. Wat ka surok PWD Mawthawpdah – Phlangdiloin ruh la plie tang ha u snem 1971.
Ka dei ka Hima bala rim bad la im suk im sain shisur shidur ha la ka duk ka kyrduh, hynrei ha ka tip hok tip pop ka shong suk shong sain wat hapdeng ki jingeh bad jingkyrduh.
Ka Hima ka sngewtynnad ban iohi bad tip ba ki la sdang ban mih ki Sengbhalang ba la ialam da ki khun hima kiba la nang la stad ban kyrsiew bad kyntiew ia ki para khun hima ha ki liang bapher bapher.
Ka Executive Dorbar U Syiem Nobosohphoh ka sngewlyngngoh khyndiat ban iohi ia katei ka mat jingthoh, ba kata ka SKHHN ka byrngem ban khang tala, ia ka Ophis u Syiem hapoh ar taiew……….!!!
To niuma, lada ka SKHHN ka sngewdon hok ban leh kumta, ka shong ha ka bor sngewthuh bad ka rai bastad jong ka. Ka Executive Dorbar u Syiem, ka don shibun ki jingeh ha ka synshar khadar hapoh ka Hima bad kitei ki 7 tylli ki mat kiba la kdew da ka SKHHN kum ki kynrum kynram, kim dei satia ki kynrum ki kynram, hynrei ki dei khyndiat tylli ki jingeh na pdeng kiba bun balang. Ka Hima ka dang trei shitom tyngeh bad thawlad ban weng noh ia kita ki jingeh kiba ngi ngeit skhem ba da ka jingiatreilang ki khun ki hajar bad ki nongsynshar shnong ka Nobo Sohphoh Syiemship hi baroh kawei, ngin sa lah ban jop lut ia ki. U Syiem bad ka Dorbar jong u, ki ieng halor ka nongrim ka shongsuk shongsain, ka jingiatreilang bad ka jingtrei shitom ban kot sha ka thong.
Ka Hima Nobosohphoh ka sngewsarong ba hadien 117 snem ei ei ka la lah ban khyllie biang ia ki hok ka riti synshar bad ka hok ki kur bad ki jaid hapoh ka Hima ban pynim biang ia ka hok ki 7 myntri kiba la ieng rasong wat hashwa u snem 1902 ba la buh jingthoh da u Deputy Commissioner badonburom ka Khasi and Jaintia Hills, ha ka 10th December 1902, ha Marngor, Nobosohphoh Syiemship, da u Captain D. Herbert ha ka jingleit jngoh kum u DC (Official Tour) ha ka jingthoh jong u ka “Succession to Syiemship in the Khasi Hills”.
Ngi tip skhem ba ki khun ki hajar ka Hima Nobosohphoh bad ki kur ki jaid kiba dei hok ban jied syiem katkum ka Herbert Report, ki sngewnguh bad ai burom ia u Paiem Kawangbor Syiemiong uba la ialam ban khylli pat ia ka mynnor shongsbai hapoh kane ka Hima bad thung biang ia ki nongjied syiem (Electors) katkum ka hok naduh ki mynbarim. Kane kala long kawei na ki jingjop jong kane ka Hima naduh u snem 2015 sha khmat.
Kum ka tyngkong u Syiem u Kmie, ka Executive Dorbar Syiem Nobosohphoh ka pdiang sngewbha ia ki khun ki hajar ban wan – ud wan – nam ha ka Ingsad Ingsumon – ka office u Syiem u Kmie ban ia sngewthuh jingmut ia ka duna ka pyngkat ym ban shu rah khubor da ka khlieng ka tyngab ioh poi ha ka jot ka pei.
Ngi kyntu ruh ia ki khun ki hajar ba shakri ia ki kam Sorkar badonburom bad bakordor ban ym pyndonkam bakla ia ka iktiar kumba la jia ha kine ki kyhndiat sngi ioh ka kyrtoh kylla ia la ka long rynieng man rynieng, sa jot sa pei ka longing longsem, na ka jingbym tyngkan.
Ha kajuh ka rukom, ka Executive Dorbar U Syiem Nobosohphoh ka kit bok kit rwiang ia ki khun ki hajar ka hima ba kin nangroi nangpar bad iarap lem ia la ki para khun hima da ka tip hok tip sot, ka tip akor ka tip burom ban im ka kyrteng sah ka nam bad roi parum pareh ha kane ka juk hiran ba mynta, ban ioh ka kyrkhu ka kyrdoh na u Kynrad na jrong na tbian.
Na ki dkhot jong ka Executive Dorbar jong U Syiem Nobosohphoh
don katno tyllli ki shnong hapoh ka hima Nobosohphoh?