Ka Hima Maharam bad Nongstoin ki la don ILP, ong u bah John

Shillong: U Chairman ka Dorbar Ki Khlieh Nongsynshar ka Ri Hynniewtrep, u bah John F Kharshiing u la ong ba u kyrshan ban pyntreikam ia ka Inner Line Permit (ILP) ha ka jylla, hynrei ha kajuh ka por, u la kam, ba ka ILP ka la don ha Hima Maharam bad Hima Nongstoin.

Haba kren sha ki lad pathai khubor myn hynnin ka sngi, u bah John uba dei ruh u general secretary ka Meghalaya Pradesh Congress Committee (MPCC) ula ong, “Nga kren pyrshah beit ba dei ban pyntreikam ia ka ILP. Kum u briew ba la shang pyrthei, nga la lap ba ka jingpyrkhing jong kiwei ki ri ka long kaba jur bha. Ban iada ia ki briew lajong kam don jingma”.
U la bynrap, “Ka Hima Maharam ha 2009 bad ka Hima Nongstoin ha 2006 kila don ka ILP ba la mynjur ruh da u Lat ka jylla, ha kaba la mana ia ka rung ka mih ki dkhar, ban rep ban riang bad ban khaii khaba”.
U la ong ba ka ain Meghalaya Resident Safety and Security Act 2016 (MRSSA) ba pdiang ka sorkar ka dei tang ka jingpyrkhing shi bynta namar bym pat don ka ain kum ka ILP.
“Ki nong Bilat ruh kiba khlain bor ki sngew ba shah tyllep ha kiwei pat ki jaitbynriew ha ri Europe. Ngi hap ban long ieid ia la ka ri. Balei ka ri Bhutan kaba pyrkhing bha ia ka jingwan rung ki briew, hynrei ka jur bha ka jingwan rung ki nongwankai nabar”, la ong u bah John.
Hynrei ha kajuh ka por, u la ong ba kaba kongsan eh ban iada ia ka jingma ia ka jaitbynriew kaba neh junom, ka donkam ban ithuh noh ia ka Instrument of Accession & Annexed Agreement (IOA&AA) kaba la iasoi ha u snem 1947 hapdeng ka ri India bad ki Hima Khasi.
“Ka IOA kan dei ka lynti ban weng ia ki jingeh baroh ia ka jaitbynriew kaba iasoi ha u snem 1948 ha ka riti synshar ka ri India hapoh ka arikil 370 kum shi bynta ba iada ia ka jaitbynriew”, la ong u bah John.
U bah John u la ong ba ia ka IOA la iasoi da u C Rajagopalachari u Governor General ka India bad ki 25 tylli ki Hima Khasi ha kaba ka Jaintia National Conference ruh ka la iasnohkti lang bad ka Federation of the Khasi States.
U la buh jingkylli balei ki paidbah ki dang syier haba ki ioh ia u MLA, MDC bad MP u briew lajong.
“Balei ki briew kin iakhih haba la jied ia ki nongmihkhmat paidbah, ki dei ki nongmihkhmat ban leh. Ngi don ki MDC, MLA bad MP lajong balei ngi dang syier pat”, u la ong.
U la ong ba u kyrshan ia ka rai ka KHADC ban leit sha Supreme Court ban tip ba ka district council ka lah ne ka bym lah. “Ka donkam ban pynrung noh ia ka IOA ban weng ia kane ka kam baroh junom”, u la ong.