KA HIGH BLOOD PRESSURE:Ka jingsumar hi ia ka high blood pressure khlem da pyndonkam ia ki dawai

Kong L Kongwang

Ka jingdon ia ka blood pressure ka lah ban pynkhuslai jingmut iaphi khamtam naduh ka rukom bam rukom dih, ka thiah ka dem, ka iaid ka ieng, bad haduh ki jingpyndonkam iaki dawai ban dih.

Lada phi dei kito kiba don iaka high blood pressure kalah ban nang pynkhuslai shuh shuh iaphi shaphang ka jingdih iaki dawai ban lait naka jingkiew ne ka jingdon blood pressure haka met jongphi. To tip ba ka rukom im, ka rukom bam bad dih, ka thiah ka dem ki shim iaka bynta ba kongsan ban sumar iaka blood pressure.

Lada phi lah ban tehlakam iaka blood pressure jongphi lyngba ka rukom im jongphi, phi lah ban ioh iaka met kaba koit ba khiah bad philah ban lait naka jingpyndonkam kloi ban dih iaki dawai ban iada naka jingkiew ka blood pressure. Hangne kidon katto katne ki jingai jingmut ha kaba iadei bad ka rukom im kiba lah ban pynduna naka jingkiew jongka blood pressure:—

1. PYNDUNA IAKA JINGKHIA KA MET:— Borabor ka blood pressure ka kiew haba ka jingkhia jongka met ka nangkiew. Ka jingkhia palat ka met kalah ban pynthut iaka rukom ring mynsiem haka por thiah kaba ialam sha ka jingkiew sted jongka blood pressure. Ban pynduna iaka jingkhia ka met kadei kawei ka lad kaba biangtam ban tehlakam iaka jingkiew ka blood pressure. Watla ka jingkhia ka met kan hiar tang khyndiat ruh kalah ban iarap shibun ban pynduna naka jingkiew ka blood pressure. Nalor ka jingkhia ka met phi donkam ruh ban pynduna iaka jingheh ka kpoh namar ka jingheh palat ka kpoh ka kyntiew bha iaka jingkhia ka met kaba ialam sha ka jingma ban nang kiew ka blood pressure.
2. KA JINGKILAN MET MAN LA KA POR:— Ka jingkilan met 30 minit mynstep bad 30 minit janmiet kadei ka dawai bah kaba lah ban pynduna iaka jingkiew ka blood pressure haka met jongphi. Lada phi don iaka high blood pressure, kan khambha ban kilan met man ka sngi khlem sangeh, namar lada phi sangeh ban kilan met, ka blood pressure jongphi kalah ban nangkiew arshah.
   Katto katne ki rukom kilan met Aerobic kiba phi lah ban pyrshang kynthup ka jingiaidkai pyngngad daki kjat, mareh suki suki, pyrshang ban niah bisikil, jngi um, lane shad dakaba pynkhih bha baroh ka met suki suki. Ka jingkilan met ka long kaba donkam bha namar ymtang ba ka iada na ka jingkiew ka blood pressure hynrei ka iarap pyllait iaphi naki jingkhuslai jongka jingmut jingpyrkhat bad ruh ban kyntiew iaka jingkoit jingkhiah jongka met.
3. BAM IAKI JINGBAM TEI MET:– Ban bam iaki jingbam kiba tei met kiba don ha baroh ki symbai, ki sohkhaw, ki jhur, ki soh, ka dud bad ki jingbam ba duna khlein ki lah ban iarap pynduna iaka jingkiew jongka blood pressure ha ka met. Ia kine ki rukom bam la tip kum ki jingbam tei met Dietary Approaches To Stop Hypertension (DASH). Kam long kaba suk ban pynkylla iaka rukom bam hynrei ban ioh iaka met kaba koit ba khiah bad ban lait naka jingkiew jongka blood pressure phi donkam ban kynthup iakine ki jait bam man ka sngi khamtam kaba bam iaki soh man la ka sngi ka iarap pynduna bha iaka blood pressure haka met jongphi.
4. KIAR NAKA JINGDIHKYIAD PALAT:— Ka kyiad kalah ban dei ka dawai bah na ka bynta kito kiba donkam iaka bad kalah ruh ban dei ka bih kaba khraw naka bynta kito kiba kyrni ban dih iaka.Ka lah ban pynbha bad ka lah ruh ban pynsniew iaka jingkoit jingkhiah jongphi. Ban dih khyndiat kumba ju pyndonkam haki dawai kalah ban long ka dawai bah na ka bynta kito kiba don iaka high blood pressure, hynrei lada phi dih palat ban ia kaba la bthah da ki doktor kan kyntiew bunshah iaka blood pressure ha baroh ki liang bad ha kajuh ka por lada phi dih palat, ki dawai kiba phi thmu ban dih na ka bynta ka blood pressure bad naka bynta ka jingkoit jingkhiah jongka met kin ym treikam shuh. Namar kata kan bha ban kiar na kaba dih iaka tang haba la bthah daki doktor.
5. SANGEH SHI SYNDON BAN DIH DUMA NE SIKRET:— Uwei u sikret u lah ban kyntiew iaka blood pressure jongphi man ka minit hadien ba phi ladep dih. Haba ka blood pressure jongphi ka kiew naka jingdih palat ia u duma ne sikret kalah ban ialam sha ka iingpang klongsnam, heart attack bad iap shiliang. Ka jingsangeh ban dih sikret ne duma kan iarap shibun ban lait naka jingkiew ka blood pressure bad pynduna naka jingma jongka jingpang klongsnam bad kyntiew iaka jingkoit jingkhiah jongka met kyllum lang. Kynmaw ba kito kiba sangeh ban dih duma ne sikret shi syndon ki kham imslem ban ia kito kiba dih khlem sangeh.
6. KIAR NAKI JINGDIH BADON CAFFEINE:— Ka jingpyndonkam iaki jingdih ba don caffeine ka don jingiadei bha bad ka jingkiew ka blood pressure. Ki kyntiew iaka jingdon ka blood pressure haduh 10 mmHg ia kito kiba ju pyndonkam ban dih teng2 hynrei kito kiba ju pyndonkam ban dih man ka por ki lah ban duna ka jingshahktah halor ka jingkiew ka blood pressure. Ki jingdih kiba don caffeine ki kynthup ia u kophi,ka sha, bad kino kino ki jingdih bathiang bad lada phi dei kiba don iaka high blood pressure, phi dei namar kata ban kiar shisyndon ban dih iakine ki jait jingdih ban lait naka jingkiew ka blood pressure bad ban ioh iaka met kaba koit ba khiah.
7. KIAR NAKA JINGPYRKHAT PALAT:— Ka jingbanbor palat haka jingmut jingpyrkhat ka ialam sha ka jingkiew sted ka blood pressure jongphi. Bunsien hi ka jingbanbor palat ha ki jingmut jingpyrkhat ka ialam sha ka jingshahktah shuh shuh haka liang ka jingkoit jingkhiah jongphi bad ki jingbam bym tei iaka met, dih iaki jingdih pynbuaid bad ki jingdih duma ne sikret ki khring bha haba ki jingmut jingpyrkhat kim treikam bha. Shim katto katne ka por ban pyrkhat kaei kaba pynlong iaphi ban khuslai bad lada phi shem iaka daw tynrai, khlempep phi lah ban tehlakam iaka jingkhuslai jingmut kaba ialam shaka jingduna ban don iaka high blood pressure. Da kaba leh kumne kan iarap ymtang iaka blood pressure jongphi hynrei kan pyllait iaphi na shibun ki jingpang bad ban ioh iaka met bad ka jingmut jingpyrkhat kaba longkoit longkhiah.