Ka FOCUS kam dei ka ram, hynrei ka jingkyrshan pisa sha ki nongrep, ong U Conrad

Ampati:U myntri rangbah ka jylla u Conrad K Sangma ha ka sngi palei mynta ka taiew, ula ong ba ka sorkar jylla lyngba ka jing wanrah ïa ki prokram bapher bapher ka la pyrshang ban wanrah ïa ki jingkylla ha ka jingim jong ki paid nongshong shnong. Ula pynpaw ïa kane haba kren ha ka jingïalang ba kynthup ïa ki nongïoh skhim FOCUS Plus, Progress, Yess Meghalaya bad SHG kaba long ha Rangatari, South Garo Hills.

“Ka Sorkar jong ngi, ka dang ïai kut jingmut ban shim khia ïa ka bha ka miat jong ki paid nongrep bad lyngba ka Focus bad kiwei kiwei ki skhim, ngi la pyrshang ban ai ka jingïarap kaba bun duh sha ki,” ong u myntri Rang bah.
“Ki prokram jong ki nongrep ba ngi wanrah ka la ai jing myntoi ïa 4.5 lak ngut ki briew. Ha ka sorkar ba la leit noh, ym shym la don satia ïa kum kine ki prokram kiba dei na ka bynta ka bha ka miat jong ki nongrep,” ula bynrap.

Haba pyntip ba ka FOCUS bad FOCUS Plus ka dei ka prokram ba heh duh jong ki nongrep ha ka thaiñ shatei lam mihngi, u myntri rangbah ula ong, “Ngi la buh thong ba uwei u briew na man ki longïing kin ïoh T. 5000 ha kine ki 10 snem ban wan bad ngi la kut jingmut bad pynthikna ïa kane”.

Halor ka jingpynsaphriang khubor lamler ba ka FOCUS ka dei ka ram, u myntri Rangbah ula ong, “Ka pisa jong ka FOCUS kam dei satia ka ram hynrei ka jingkyrshan pisa ba la ai sha ki nongrep jong ka jylla”.
U myntri rangbah ula pyntip ha kane ka jingïalang ba ka sorkar ka la mang T. 450 klur ban pyntreikam ïa ka FOCUS hapoh ka jylla. Ula pyntip ruh ba haduh mynta, ka sorkar ka la dep ban sam haduh T. 200 klur na ka FOCUS bad FOCUS Plus sha ki paid nongrep jong ka jylla.

“Ka jingjop jong kane ka prokram kan shong ha phi”, ula ong haba ban jur ba ki nongïoh jingmyntoi ki dei ban pyndonkam bha ïa kane ka pisa na ka bynta ka jingdonkam jong ka kynhun.

Haba pynpaw ba ka FOCUS ka dei ka prokram bapher bha kaba la ai jingmyntoi beit beit ïa ki nongrep, u myntri rangbah ula ong ba ki riew khwan myntoi kim dei ban leh politik ïa kane ka prokram.
“Kane kan wanrah ïa ka jingkylla ha ka jingim jong ki briew. Kane ka prokram ka dei eh na ka bynta ban wanrah ïa ka bha ka miat bad ki jingmyntoi ïa ki briew lajong,” ula ong.