Ka Facebook U Khasi

Ka “facebook” Kumba ngi ju tip baroh, kadei kawei na ki lad ‘Pathai khubor’ daki kor ki bor Jingstad saian.Hakawei ka liang, lah ban ong, ka facebook, ka dei kawei pat ka “pyrthei electronic” bad la tip kyllum iaka haka ktien phareng kaba kynthup da Kata ka “Social Media “.Hangne ngi ioh ban iakynduh,lyngba ki jingthoh jongngi,ki videos, ki dur bad kiwei kiwei ki bynta ba la buh haka.Ka dei ka lad phah jingtip, ne pyntip hala ka jong ka jong ka mon uba bun balang, katkum ka jingsngewdonkam jongu.
Jan baroh ki nongshong shnong ha pyrthei ki pyndonkam iaka Facebook, laitnoh hakito ki ri kiba la khang pyrshah, bad hakito ki briew kibym da ioh iaka jingnang jingtip, bad katto katne nakiwei pat ki daw.
Ha ka jaidbynriew u khun khasi khara ruh ngi shem mynta, bun kito kiba la nangthoh nangpule ki lah ban pyndonkam iaka facebook, lyngba ki Mobile phone ba lah ban Connect internet, bad lyngba ki computer kumjuh.Ki don ruh wat kito ki bym da nangbha ne sngewthuh iaka ktien phareng (English) Ki iabehlem ban pyndonkam iaka facebook.
Ha ka Jaidbynriew jongngi, kane ka jingshongshit facebook, kam pat da slem eh ,namar wat iakane ka facebook ruh la sdang pyntreikam iaka ha u snem 2004.Kumta ngi lah ban khein, ka facebook kan jia shangi shane hapdeng 2010-2013(Wat sngew eiei ki nongpule lada nga bakla).Bad mynta ka la shongshitbha, khamtam hapdeng kito kiba dang “Khynraw”, bad don ruh kiba la shong ngiah noh, naki ba bun ki daw.
Haba iatai ia thir, iaka jinglong ka facebook, naduh ba la ioh ban sakhi,khamtam hapoh ka jaidbynriew khasi khara, ngi lah ban ong, “Ka ba bha ruh ngi shem, kaba sniew ruh ngi shem”.Haki por ba kham Mynshwa, ka facebook, haka jaidbynriew jongngi, ngim pat da iohi eh kita ki jinglong jongka kiba pyntngit ia ka longbriew manbriew.Ka don bun kaba myntoi shibun, hakaba iatei ia phylliew jingmut, bad phah jingtip markylliang hakaba shisha.
Hynrei hadien hadien, ngi shem ba ka jingbym itynnad ruh ki paw bad ki ioh ban pur laitluid hakane ka pyrthei facebook u khasi.
Katto katne kiba iktah eh ka long, don kita ki kynja kynhun facebook(Groups facebook) kiba wanrah ki jingthoh pyniapher bad pyniapait jaidbynriew hapdeng Parakhasi khara.Khamtam kaba ia kynthoh “Niam” laiphew jait.Uwei u bein ia uwei u niam, kumjuh uta uwei pat ruh! Kane shisha ka long kum ka bih seiniong nakabynta ka jinglongsngur ka jaidbynriew jongngi.Nangta,sa ka iathad briew, kaba jia manla ki por.Kine ki jingiathad briew, wat iaka bym i long ban thad ruh,ki ia khyrwit beit, la kum kito ki nongthoh kotkhubor kiba tbit haka kam! Shuh shuh, haba iatai iathir ia ki katto katne ki mat ba donkam ruh! bun kiba donpor khlem pyrkhat ban thoh wat da ka sih ka sang,ka tim ka tla, La I kumba ka shympriahkti ba ki ‘type’ ia ka jingthoh kam don shyieng kum u thylliej!!!
Kam pat kut tang katta, teng teng lei shait paw wat ki kam bad ki jingthoh ba khlem rain.Ki don lei kito ki groups facebook, kiba shu imsngi beit kumno ban iathoh khlem rain kiba ktah iaka jinglong kynthei bad shynrang!
Kine ki dei ki katto katne ki jinglong ba sniew ,ki long Kum ki nongpynshit pynsmiej khamtam ia ki para samla jongka jaidbynriew,dakine ki jinghikai ba isaitmet ban peit !!!
Hoid ngim lah ban len don shibun bah kiei kiei kiba sngewtynnad ban iohi  lyngba ka facebook, kiba jia, kiba man, kiba long hapoh ka RI bad ka jaidbynriew khasi khara!Hynrei kaba kongsan ka jingmut hangne, ba balei? ka facebook ka long tang ka tiar electronic ba ngi pyndonkam iaka, Hynrei ngim lah ban kyrda iakita ki jinglong bym itynnad jongngi ba kin paw pyrthei haka.??? Hynrei shisha, ngim sngewphylla iakata, kaba pynlong hi iakine kiei kiei baroh dei,na ka rympei shlem saindur!!!Haduh ba ka sarong kyreit, ka bymtip bynriew ka synshar haka shynrong jabieng ki jingmut jingpyrkhat,bad ka paw plak sha ka pyrthei durbynriew ba ngi thaw hi!!!
Toi, watla ngi tip ba lehse kita kin don beit ha man la ki bynta ba u bynriew u khih u kam, Hynrei kam long pat ka jingsngapjar kumba ngi mynjur bad ngi pdiang hun mynsiem iakaba jia ba long, dakaba iehnoh iaka khlem da thew da khynniat teng teng iaki jait bymlong baroh.
Kumba don ka woh ka tai iaka “bhalang”,kumta ruh ka don ka woh ka tai iaka “sniewlang”.

Te haba pynkut iawai, “ka tyngkan, ka peit ka khmih” shuwa ban ryngkoh, kadei ka kyntien nyngkong nyngshap naduh ka longrympei u khun khasi khara!

Khublei shibun

B:N:- U nongthoh u pdiang iaki jingkynthoh ne ki jingmut ba la pynsngew hakane ka bynta!!!

Shri. Dap B. Syngkrem
[email protected].