Nongstoiñ: Ka elekshon MDC ka la jan, ong U President ka seng UDP bad ia katei ula kren ha ka jingialang jong katei ka seng, kaba la long myn hynnin ka sngi, ban pynkup burom ia ki nongtrei bad nongseng ia katei ka seng hapoh Nongstoiñ kiba la iadon bynta naduh kaba sdang ban seng ia ka kata naduh u snem 1997 bad kumjuh ki la kynmaw burom kyrpang ruh ia kito kiba la khlad noh na kane ka sla pyrthei.
Ki-nongseng-jong-ka-UDP-Nongstoin-kiba-dang-iashon-dur-lang-bad-u-President-rangbah-hadien-ka-jingshah-pynkup-burom.
Kitei ki nongseng ia katei ka seng hapoh Nongstoiñ, kiba la shah pynkup burom ha katei ka jingialang, ki la don haduh kumba 18 ha kaba u Dr. Donkupar Roy President ka Seng United Democratic Party (UDP), u ba long kum u kongsan u la ioh ban pynkup burom ia kitei ki 18 ngut bad ha kajuh ka por kum ka dak ban kynmaw burom ia ki 4 ngut kiba la khlad noh na kane ka sla pyrthei.
Haba ai jingkren ha katei ka jingialang na ka liang jong u Dr. Donkupar Roy President ka Seng United Democratic Party (UDP) u ba dei ruh u Lamphang ka ïing Dorbar thaw aiñ jong ka jylla, u la ong ba katei ka jingleh jong ka UDP Nongstoiñ Circle ban pynkup burom ia ki nongtrei ka Party kiba la rim ka long kaba donkam eh bad katei ka jingleh jong ka UDP Nongstoiñ Circle kan long ruh ka nuksa kaba bha ba ka bynta kiwei pat.
“Naduh ba la sdang ban seng ia ka Party UDP ngim pat ju ioh ia ki MLA/MDC napoh Nongstoiñ hynrei ki nongtrei jong ka Party pat ki iai neh bad kim phet seng bad kane ka long kaba kongsan eh hapoh ka party bad ka daw jong ka jingbym jop ia ki ilekshon ka dei namar ka jingbym pynkhreh bad ban jop ia ka ilekshon ka party ka donkam ban don ia ki kyrtong ha ryngkat ki nongtrei kiba biang” ong u Dr. Donkupar Roy.
Shuh shuh u la ong ruh ba ka MDC ilekshon ka la jan bad u la pyntikna ruh ba katei ka ilekshon kan long beit ha u 2019 la kumno kumno ha u bnai Rymphang lane ha u Iaiong bad kumta u la kyntu ia ki nongialam jong ka seng napoh Nongstoiñ bad kumjuh jong ka West Khasi Hills, ba kin nang pynkhlaiñ noh shwa ia ka party da kaba u la ong ruh ba lada iai bteng ban ialeh ia ki ilekshon ryngkat ka jingkyrmen khlem pep shisien ka sngi ka UDP ruh kan sa ioh ia ka jingjop napoh Nongstoiñ.