Ka elekshon ha Mizoram, kaba khuid bad kaba lait na ka bor ka tyngka

Aizawl:Ka elekshon ha jylla Mizoram ka dei kaba laitluid,na ka jinglah jong kawei ka seng ba la tip kum ka Mizoram People Forum (MPF), kaba dei ka kynhun jong ki balang ban peit ngor ha shwa ban thep ia ki vote.

Kane ka kynhun ba la seng ha u snem 2006, ka la leh ia kaba kongsan bha ban pyntikna ba ka elekshon ha jylla Mizoram ka long kaba khuid, kaba shai khlem kano kano ka jing shah pynthame ha ki bor jong ka tyngka.
Ka MPF ka la ioh jingkyrshan pura na kiba bun ki seng saiñ hima sima kynthup ruh ia ka seng ba paw bha ha ka jylla ka Young Mizo Association.

Ka MPF ka peitngor kyndiang ia ka jing pynlut pynsep jong ki kyrtong, ki seng saiñ pyrthei bad ka pynlong ruh ia ka jingialap elekshon ban iasei nia ha kawei ka rynsan ia ki kyrtong ban khring ia ka vote na ki paid nong thep vote ban batai bniah bad pynshai ruh ia ka thong ka jong ki.
Ha ka elekshon ban sa long shen ka MPF ka la buh lypa ka jingmana ia kino kino ki kyrtong ba kin sam pisa, ai tiar ei ne kino kino ki jingai sngewbha sha ki nong thep vote.

Kane ka dei ka bynta ba la buh ban pynduna ia ka jing lut jong ki kyrtong bad ka jingma ia ki paidbah.
Ki bor pyniaid elekshon ki la pynpaw ba ka thong jong ka MPF hi ka long ban pyntikna ba ka elekshon ka long kaba khuid ba duba bad kaba lait na kiei kiei bad naduh ba ka la mih ka MPF kam pat juh don ka jing pynkheiñ ia ka model code of conduct ha jylla Mizoram.
Ka MPF ka trei ia ka bynta ba donkam tam ia ka jylla Mizoram, ka jylla Mizoram ka don haduh 87 persen ki nong shong shnong kiba dei ki Kristan ha kaba ka balang ka leh ia kiei kiei kiba donkam tam ha ka imlang sahlang.

Ka jinglah jong ka MPF ban wanrah ia ka Elekshon ba khuid ba suba ka dei kaba ai nuksa ia kiwei pat ki jylla ha ka ri, da ka jingiatreilang hapdeng ki seng saiñ hima sima, ki kynhun balang bad ki seng saiñ pyrthei ban thaw ia ka elekshon ba khuid ba suba ha ka synshar paidbah.