Shillong: Ka jingialang ki Principal/Headteacher/Headmaster jong ki skul Lower bad Upper Primary Schools ka thain Warjaintia ba lah khot da ka War Jaintia Students Union Central Body ban pynkhreh ia ka First War Jaintia Scholarship Examination 2024 ka long kaba shongkun bha.
Na ka liang ka seng ka la pynshai sha ki khlieh nonghikai jong ki skul Lower bad Upper Primary Schools ka thain halor ka jingthmu ka seng ban pynlong ia ka First Warjaintia Scholarship Examination 2024.
Ha kane ka jingialang, la ioh ia ka jingpynshai na u Bah Alban K Gashnga, Chief Adviser ka seng halor ka jingthmu jong kane ka scholarship examination ban wad ia ki khynnah naduh dangrit kiba don ka sap ka phong ha ka liang ka pule dangle ban ai ka jingiarap pisa ha ka dur ka scholarship, nangta ban pynmlien ia ki khynnah pule naduh dangrit ban myllen ia kum kine ki competative examination khnang ba ynda ki lah heh kyrdan kin mynlen bd kin jop ia ka thma pule dangle ha ka jingim jongki bad lyngba kane ka competitive examination kyrmen skhem ka thain War Jaintia, kan sa pynmih shibun ki ophisar kum ki IAS,IPS,MCS bd MPS ha ki snem ki ban dang wan.
Kumba long mynta kiba bun ki khynnah pule, kim kot tang 5 percent bd ki khynnah pule ha ki jaka sor bad la kyrmen skhem lyngba kane ka competitive examination, ba ki khynnah pule kin lah ban ia khun bad kiwei ki bynta jong ka jylla bad ka Ri baroh kawei.
Ha kane ka jingialang lah ioh ruh ka jingkren na u SP ba lah shongthait bah K Rymbui ba dei uwei na ki Advisor ka seng.U Bah K Rymbui ha ka jingkren jong u, u kyntu ia ki nonghikai ba kin pynsaphriang ia kane ka jingiakren ha kane ka workshop bd kyntu ia ki nonghikai ban pynsngewthuh ia ki kmie ki kpa ki khynnah kum ka jingpynshlur ba ki khun jong ki kin ia shim bynta ha kane ka competitive examination bd ban kyrshan ia ka seng met ban mynsiem ban pynlong ia kane ka scholarship examination kaba jop.
Na ka liang u President rangbah ka seng u Jambok Lanong, u la kyntu kynpham ia ki nonghikai ban shimkhia lem ban pynurlong ia kane ka competitive examination kan long kaba jop bad lyngba kane ka examination kyrmen ba ki khun ki kti jong ka thain, kin sa ioh ban kheit ia u soh uba thiang ha ka jingim jong ki.
La ioh ruh ia ka jingkren na u Education Secretary ka seng A Sumer ba ka competitive examination kan long ha ka 14 tarik Nohprah 2024. Ha kajuh ka por ia ka exam yn pynlong ha ki 14 Tylli ki Examination centres bad ia ka khusnam scholarship yn sam ha ka 21 tarik Nohprah 2024 ha Amlarem. U General Secretary ka Seng Everest Langstang u ai khublei kyrpang ia ki nonghikai kiba lah kloi ban wan sha kane ka jingialang kum shi bynta ban iasnoh kti bd ka seng ban pynurlong ia kane ka competitive examination hapoh ka thain War Jaintia.
Na ka liang ki nong hikai lah kren da shibun ngut bad ki pynpaw ia ka jingkyrshan ia kane ka competitive examination ban pynmlien ia ki khynnah pule naduh dangrit ban mynlen ha kum kine ki examination ban jop ha ka jingim jongki. Ki nonghikai da ka mynsiem shitrhem ki kloi ban kyrshan ia ka seng wat ha ki fund raising na ka bynta ban pynurlong ia ka kane ka jingthmu ba bha ia ka lawei ki khun ki kti jongngi.
Phi don ban ong eiei?