Ka East Khasi hills, ha ka map jingjulor ba shyrkhei, na ka jingtuid ka khyndew

Shillong:Ka jingtohkit jong ki arngut ki saiantis, ba kynthup ia U Ravi Raj bad U Manabendra Saharia, na ka Hydrosense Lab, jong ka Indian Institute of Technology, Delhi (https://hydrosense.iitd.ac.in/), ka iathuh ba ka jingtuid noh jong ka khyndew ka long kaba jubor haduh katta katta bad la lap ba ka jingtuid jong ka khyndew ha ka shisnem, ka long haduh 21 ton, na ka bynta shi hectare ha ka shisnem lane kaba long 1048 million ton ha ka shisnem shisnem.

Ka jinglap jong kitei ki stad, ka iathuh ba ki jaka kiba jubor tam ka jingtuid noh ka khyndew, ka dei ha ki 9 tylli ki jaka ha Assam, 3 tylli ha Meghalaya bad ki jaka, ba jubor tam ka jingtuid noh ka khyndew, ki dei ka East Khasi Hills, Jaintia hills bad South Garo hills. Ka jingtuid noh ka khyndew ha East Khasi hills, ka long 164.52 ton ha ka shisnem, katba ha Jaintia hills, ka long 112.73 ton ha ka shisnem bad ha South Garo hills, ka long 104.49ton ha ka shisnem. La iathuh ruh, ba kitei ki dei ki jaka, kiba u slap u jur bha bad kumta, ka jingtuid noh ka khyndew, ka dei ruh na katei ka daw.

Katei ka kaiphod, ka iathuh ba kumba 5 percent, na ka khyndew kaba hap ha Assam, Meghalaya bad Himachal Pradesh, ka dei kaba hap ha kata ka kyrdan E6 (catastrophic) lane kaba don jingma haduh katta bad la iathuh, ba ha kitei ki jaka, ka jingshah rong noh ka khyndew, ka poi haduh 100ton shi hectare ha ka shisnem bad katei ka pynjot thiaw ia ki kynroh, ki iing ki sem bad kiwei ki jingtei bad la khein antad, ba ki 78 million hectare, ki jaka rep, ki hiar noh ka jingseisoh jongki, kaba 8 percent ha man la ka shisnem, na kane ka jingshah rong noh ka khyndew sboh.