Ka dukan U Sardarji, kaba isaitmet bad kaba iewkhong, ong ka MPUF

Shillong:Ki dukan kiba don harud jong ka surok bah, ki dei ki ba donkam tam ia ki nongleit nongwan na jan bad na jngai ha kaba man wei pa uwei u nongleit nongwan un hap ban shaniah ia ka bam ka dih na kine ki dukan kiba don haruh surok, hynrei ka bam ka dih ha kine ki dukan katno eh ki lah ban shaniah ha ka ba ia dei bad ka khuid ka suba ha kine ki dukan.

Mynta ka sngi na ka liang ka Meghalaya People United Front RiBhoi District ki la hiar jurip ia kawei ka dukan jong uwei u bar jylla ka kyrteng ka Sardarji Da Dhaba, kaba don ha Pahamrioh Nongpoh ha kaba la lap ia ka jing isaitmet ha ka rukom shet rukom tiew ia ka bam ka dih kaba lah ban buh ia ka jingma kaba khraw ia ki nongbam nongdih na kane ka dukan.

Haba ia kren bad u President ka MPUF u bah Jackson Sohtun, u la iathuh ba la lap ia kane ka rukom shet bym i khuid i suba, hadien ba na ki katto katne ki briew ki la hiar sharum ban leit sha bar ha kaba ki la shem ba kane ka jaka shet jong kane ka dukan ka long kaba i sait met bad kam shym la don kano kano ka jingshim khia ban shet ia ka bam ka dih ka jingkhuid jingsuba.

U la iathuh ruh ba la shem ruh ba ha kane hi ka jaka shet ki ju pynlait ia ki jaboh ha kawei ka thliew kaba lang shi jaka bad ka ne ka jingpynlang ia kane ka jakhlia, ka la pynsma iwtung, ym tang ia kane ka dukan hynrei wat ia ki ing bad ki dukan ki ba don ha mar jan kane ka dhaba.
Na ka liang ka seng ka la kyntu ia ka Food and safety bad kumjuh ia tnad ka koit ka khiah, ba ki dei ban shim khia ban leit jurip ia baroh ki dukan ki ba don ha ki thain RiBhoi khnang ban lah ban pynthikna ia ka jingkhuid jingsuba kan don ha ki ne ki dukan bar jylla bad kan ym wan rah ia ka jingma ia ki nongbam ha ki ne ki dukan.
Na ka liang ka seng kan dang bteng shuh shuh ia kine ki jingjurip sa sha ki wei pat ki dukan lane ki dhaba ki ba don ha shilynter jong ka sor Nongpoh hi baroh kawei.