Ka dud ka kmie dei ka jingai U Blei, ong ka Kong Roshan

Shillong, 02 Nailur:
Ka Myntri ka tnad ka koit ka khiah ka jylla ka Kong Roshan Warjri ka la pynlait paidbah ia ka MAA ne ka Mother’s Absolute Protection, ka prokram ba la pyntreikam da ka sorkar pdeng ban ialap paidbah ba ka dud ka kmie ka dei kaba bha tam ban ai ia I khyllung. Ia kane ka jingpynlait paidbah la pynlong ha Ganesh Das Hospital, Lawmali ba la don lang u Secretaries ka tnad u Bah K.W Marbaniang, u Director u Dr. R.Wankhar, bad kiwei.
“Ka dud jong ka kmie ka dei ka jingai ei ba kordor tam jong u blei ia ki khyllung”, la ong ka Kong Roshan.
Ka la ong ba ka dud ka kmie ka iada bun bah ki jingpang ia I khyllung bad ka long kaba donkam eh ban pynialap paidbah ban pynsngewthuh halor kane.
Ka la ong ba ki jingbam ba tei ki dei kiba kongsan bha ban pynthikna ia I khyllung ba koit ba khiah shwa bad hadien ba la kha. Ka la ong ba ka kmie ka dei ban bam ia ki jingbam ba tei naduh ba ka dang pung bad hadien ba ka la kha ia I khyllung. “U lok bad kiba haiing hasem ki dei ban ai ia ka jingkyrshan ia ka kmie ha ka bor met, ka bor pyrkhar haba ka don ha ka jingpynkhreh ban kha khyllung bad kane ka long kaba kongsan bha” ka la ong.