Ka dorbar niamtre ha Nartiang

Ynda haba ki Syiem Sutnga ki la mih noh na ka shnong Sutnga ba kim kwah ba ka Sutnga kan long sah ka Nongbah jong ka Hima. Kumta ki la kynriah noh ban pynlong Nongbah jong u Syiem Sutnga noh ha Nartiang. Naduh kata ka por ïa kitei ki Syiem Sutnga la khot noh da ki Syiem Nartiang, namar ba ka shnong Sutnga ka don sha kyndong. Ki la ïohi ba ka shnong Nartiang ka don hapdeng jong ka ri u Khadar Doloi Khadar Nor. Hynrei dei nangne na Nartiang pat ba hadien la pynkynriah biang ïa ka Nongbah ki Syiem sha ka shnong Jaiñtiapur rithor Surma valley.

Kumta la tip noh ïa ki Syiem Sutnga kum ki Syiem Jaintia. U Syiem Parbat Ray na Nartiang ula leit pynheh hima sha rithor Surma. Hadien pat la tip ïa ka kum ka Jaiñtia Parganas kaba heh 484 Sq Miles. Ka Satbak parganas ka don sha shiliang wah Surma. Ka ïatyngkhuhbad ka Tippera State mynshuwa (Tripura State), ka heh haduh 36.85Sq miles. Haba ki jhad jong u Syiem Mughal bad ki jhad jong ka East India Company ki iaid lyngba ka wah Surma ki hap ban siew ïa ka khajna ne ka pynshok sha u Syiem Jaiñtia.
Ki khar Jaiñtia ha Jaiñtiapur ki ong ïa u Parbat Ray ba u long u trai u kynrad jong ki lum.Ynda ula sah katto katne por ha ki thaiñ Jaiñtiapur, u la bia ïa kawei ka khun syiem Cooch Bihar (Mynta ha West Bengal). Kane ka tnga jong u ka don ha ka niam Hindu. Kumta u Parbat Ray ula rung noh sha ka niam Hindu namar ba u maia palat ïa ka. Hynrei ki syiem kynthei na ka jait Syiem Jaiñtia Syiem Sutnga kim ju shong kurim ïa ki khar Hindu.

Ki kmie ki kpa ki Ma ki Woh jong u Syiem ki pynbiang kurim ïa ki khun syiem kynthei da kiba ngeit ha ka Niamtre jong ka Rilum Jaiñtia. Ka Nartiang haduh ka snem 1834 ka dang dei ka nongbah lyiur ne ka Summer Capital jong ka Hima Jaiñtia. Ngi ïohi ba na ka Hima Sutnga hadien ka kylla Hima Nartiang nangta pat hadien la tip ïa ki kum ka Jaintia Kingdom. U Colonel Lister u briew jong kacompany u la pynhiar khet bad pynduh syiem ïa u Syiem Rajendra Sing ha ka 15 tarik u March 1835. Ki Phareng kila ai penshon ïa u. Tangba kila set phatok ïa u ha kawei ka ïing (House Arrest) ha Sylhet hajan ka Maurichand College kaba ha Sylhet haduh ba un da iap ha ka snem 1861. Kim shah ïano ïano ruh ban leit ïakynduh ïa na ka ri Jaiñtia.