Ka dorbar mang tyngka 22-23 ha ka iing dorbar thymmai, ong u lamphang

Shillong:U Lamphang jong ka ing dorbar thawain jong ka jylla, u bah Metbah Lyngdoh, myn hynnin ka sngi, u la ong ba u don ka jingkhmih lynti ba ia ka Dorbar mang tyngka jong u snem 2022-23, yn pynlong hapoh ka ingdorbar thawaiñ ba thymmai ha Mawd iang diang.

Haba iakren bad ki lad pathai khubor u bah Lyngdoh, u la iathuh ba wat la ka don ka jingeh ki ba bun na ka daw ka khlam Covid -19 hynrei ka jingtei ia ka ingdorbar ka la dep kumba 80-85 %.

“Nga sngewkmen eh ba wat la ka don ka jingeh na ka daw ka jingwan lyngshop ka khlam ha ka jylla hynrei bun na ki kam ki jam ki la iaid shaitshait ha kaba lada ngi lah ngi buh por ba ngin pyndep ha shuwa ban kut une u snem”u la ong.

Ban pynthikna ba ki kam ki jam ban tei ia ka ingdorbar thawain ba thymmai ha Mawdiang diang kan iaid shaitshait,na ka liang u Lamphrang ka ingdorbar u la khot ia ka jingialang kyrpang ban ia kren halor kane ka bynta ha u taiew ba ladep mynta u bnai ha ka ba la iadon ryngkat ki ophisar na ki tnad bapher bapher.
Ha kane ka jingialang la ia kren ban pyniaid ryngkat ryngkat ia baroh ki kam ha ka ba iadei ban pyndep ban tei ia kane ka ingdorbar thawain ba thymmai ha Mawdiang diang. U la iathuh ba ka ba dang sah mynta ka dei ruh ka jingtap ia ka tnum (dome part) na ka bynta ka hall baheh, ka ban sa pynpoi ha shuwa ban kut mynta u bnai na Culcutta ban ioh ban pyndep ia kane ka kam ha u bnai ban Nailar.
U la iathuh ruh ba ka kam ha ka ba iadei bad ka kamra na ka bynta u Lamphang,ka kamra u Myntri rangbah,ka kamra ki minister baroh ka Conference hall ka Canteen bad ka kamra na ka bynta ki ophisar ka dang iaid shait shait.
U la iathuh ruh ba na ka liang ka tnad pulit ki la dep ban jurip bad ban pynthikna ba kan don ka jingshngain hapoh ka ingdorbar thawaiñ ba thymmai. Na ka liang ka MePDCL ka la dep ban wan jurip bad la dep ithuh ruh ia ka jaka ban buh ia ka substation hapoh ka Compound jong ka ingdorbar bad ki kam ban pynpoi bording ka dang iaid shait shait.
Na ka liang ka tnad PHE, ki la dep ban jurip bad sdang ki kam halor ka jingpynpoi um ia kane ka building ba thymmai bad kumjuh na ka tnad khlaw ban ioh ban pynitynnad bad thung ia ki jingthung ha ki jaka ba dei ha kane ka ingdorbar thawain.
La aiti ruh ha ka NIC jong ka sorkar jylla ban ia syllok bad ki Consultant na Delhi ha kaba iadei bad ka Design Associate ha kaba ki la iakren ban sdang noh ia ka kam.Ka tnad PWD ka dei ban peit ia ka jingiaid beit ki kam ki jam baroh ban pyndep noh ia ka ingdorbar thawain ba thymmai, u la ong.