Ka dorbar Kur jong ka Jait Lyngdoh Pyngrope

Shillong: Ka Dorbar Kur jong ka Jait Lyngdoh Pyngrope kaba Laiphew Hynniew kaba la long ha ka Shnong Nongkrem ha ka 15th February, 2020 ka la long kaba shitrhem shibun eh.

Ki dkhot jong ka Kur naduh ki Longkmie, ki Mei Nah, Meisan, ki Kni ki Hymmen ki Para kumjuh ki Khyllung ki Khynnah kiba long ki Pyrsa, na ki Unit bapher bapher ki la wan ryntih bha.

Ha kane ka jingialang la ioh ban sdang da ka jingpynher ia ka Lama jong ka Kur da U President ka Seng Kur, Bah Chamberlain Lyngdoh, uba pyniaid ruh ia ka jingialang ha kane ka sngi. La ioh ka jingkren pdiang sngewbha na U General Secretary Bah Bhalang Lyngdoh. Nalor ki kam kiba bun kiba ka Kur ka la ioh ban pyndep, la ioh ruh ban jied thymmai ia ki Nongkitkam na ka bynta u snem 2020-25, kumjuh ruh ban sam ia ki “Educational Award” sha kiba pass bha ha ki Jingpule. Ha kane ka sngi, ka Dorbar Kur ka la pdiang ruh ia ka Draft Constituion ne Ka Riti Treikam, jong Ka Seng Kur Lyngdoh Pyngrope, ba la pynkhreh da U Lyngdoh ka Kur, Bah Pyniaidsuk Lyngdoh.
Ka Kur ka la iakut ruh ba lyngba kane ka Riti Treikam ne Constitution, yn register ruh ia ka Seng Kur sha ki Bor Sorkar, bad ban pynithuh ruh sha Ka District Council bad sha ka Office U Syiem ka Hima Khyrim bad ban ia snoh kti lang ruh bad Ka Synjuk ki Dorbar Kur ka Bri U Hynniewtrep.
La pyniphuh iphieng ruh ia ka Jingialang Kur da ki jingrwai bad ki jingshad na ki khun samla jong ki unit bapher bapher.
La ioh ka jingkren ai khublei da i Bah Baniwell Lyngdoh, Vice President, Bad la pynwai da ka jingkyrkhu kyrdoh bad ka jingpynhap bad khylliap noh ia ka Lama Ka Kur da U President.