Ka donkam, ba ngin pynneh pynsah, ia la ka jong, ong u lamphang dorbar

Shillong:U bah Metbah Lyngdoh, President jong ka seng UDP, haba kren ha ka jingleh burom mynta ka sngi, ia ki shipai ialeh jylla rilum, ula pynpaw, ba ka long kaba eh, ia ki nongialam jong ka parti, ba kin lum ia ki kyrteng jong kitei ki volunteer, namar ba kim don ia ki jingthoh jingtar kiba biang bad ula iathuh ba ka parti, ka don jingthmu ban iit bad ban wad ia kitei ki nong ialeh jylla rilum bad ula ong ba kane ka dei tang ka jingsdang bad ula pynthikna, ba ka seng, kan sa pynlong biang sa kawei pat ka prokram, ban leh burom ia kitei ki nongialeh jylla rilum.

U bah Lyngdoh, ula pynsngew shuh shuh, ba ka parti ka kwah ban lum ban lang ia baroh ki nongialeh jylla rilum bad u iathuh ba ki don kumba 300ngut ki volunteer, kiba ka seng, ka la ioh jingkhein haduh ha kine ki sngi, tangba na kitei, la lap ba ki don ruh ki bym dei ki nongialeh hill state bad nangta ula ong shuh shuh, ba haba peit ia ka jinglong jingman ha kine ki sngi, ka donkam ban sngewthuh hapdeng ki khun samla, ia ka jingsngew trai bad u ong “Lada ngim tip, ia kaba mynshwa, kumta ngin tip, ban iaid shakhmat” bad ula pynsngew ruh ba ka seng UDP, kan pynkhreh ia ka mat ilekshon jongka, ha kane ka sien kaba mynta, ban pynrung halor ka jingialeh jylla rilum bad ki shipai kiba don bynta ha katei ka por.

“Kiwei ki parti, ki iakren tang ia kaei kaba ki ong kata, ka development bad kane ka dei ka bynta, kaba ngi dei ban long kiba husiar bha” bad u ong shuh “Ka Development, ka long kaba donkam, hynrei ha kajuh ka por, ka long kaba donkam, ba ngin pynneh pynsah, ia la ka jong” ong shuh u lamphang dorbar.