Ka District Council, ka lah ban lum khajna ia ki kali bar Jylla

Shillong, 27 Nailur:
Ka High Court mynta ka sngi, ka la shim bishar ia ka mukotduma jong U Maiantis Mawlot pyrshah ia ka Khasi District Council bad ka kashari, ka la iai pynneh ia ka bor jong ki District Council, ba kin buh ia ki briew, ba kin peit halor ka jing iaid beain da ki kali jong ki bar Jylla, hapoh u pud u sam jong ka Khasi District Council.
Ka Executive Committee, ha ka por ba u long Secretery, U bah W Syiemlieh, ka la weng noh ia ka kontrak jong U bah Maiantis Mawlot bad ka la aiti thymmai ia katei ka kam, ha U bah Sony Tariang, ha kaba la ia mynjur ruh ban aiti ha U bah Tariang, ba un pyniaid ia katei ka kam ban peit ia kitei ki kali beain jong ki bar Jylla.
U bah Mawlot, u la leit sha Kashari, halor katei ka jingshah weng noh jong ka kontrak jongu, hynrei ka Kashari, ka la kyntait noh ia katei ka jing ujor.
U nong iasaid jong ka sorkar Jylla, U Bah ND Shullai, ula iathuh ba ka KHADC, kam don bor ban buh ia kitei ki khyrdop lum pisa ia ki kali jong ki bar Jylla.Na ka liang jong U Chief Secretery ka sorkar Jylla, ula hukum ia ka Council, ba kan khan glut ia ki khyrdop lum khajna jongka ha U Iaiong 2016 bad halor katei ka hukum, la khang noh da ki Deputy Commissioner jong ka East, West bad Ri Bhoi District ia ki khyrdop jong ka Council.
Ka Kashari, ka shim ba haba ka Council, ka iaid katba kum ki kyndon jong ka Sixth Schedule jong ka riti synshar Ri, kumta ka don hok ban peit ia ka jingtrei kam jong ki bar Jylla, ha u pud u sam jongka bad ka donbor ruh namarkata ban buh ia ki briew jongka, ki ban pyniaid ia katei ka kam.