KA DEPRESSION:KI DAW JONG KA DEPRESSION BAD KI LAD JINGIADA BAN IALEH PYRSHAH IA KA

Kong Linda Kongwang

Ka depression kadei kata ka jait jingshitom kaba ktah shi katdei ia ka jingmut jingpyrkhat khamtam ha kine ki sngi bad kane ka jingshitom ka kynrei bad ktah ha satlak ka pyrthei.

Ka jingjur ka jingiakop ha kane ka juk mynta bad ka jing banbor haka jingmut jingpyrkhat ka pynlong ia u briew ban sngew syier bad sngewduh jingkyrmen haka jiingim kaba ialam shaka jingshah ktah ka bor jabieng bad kane ka ialam shaka depression. Lada ka jingsngewsih ka neh tang kumba katto katne por, kam pher, kane kam da ktah eh ia ka jingmut jingpyrkhat hynrei lada ki neh pat daki taiew ne da ki bnai, phi lah ban don ia ka depression.

2.KA DAW JONG KA JING SHAH KTAH NA KA DEPRESSION: Ka depression kadei ka jingshitom kaba pynsuhsat ym tang ia ka met ka phad hynrei ia ka rukom im ba man ka sngi ruh.Ki Katto katne ki daw kiba ialam ia u briew sha ka depression kilong:

1. KA JING IAMAI IAKAJIA : Ka jingiamai kajia ka dei kawei kaba wanrah ia ka jing bym sngew tynnad haka imlang sahlang bad ka jujia ruh bunsien bad kito kiba phi ithuh ne don jingiadei kaba jan. Kane ka jingmlien ban iamai iakajia haka ba kut jong ka sngi ka pynlong ia u briew ban sngewdom ne buhkhoh kaba kyntiew ia ki jingbanbor ka jingmut jingpyrkhat bad kaba lah ban ialam sha ka depression.

2.KA JINGPYNDONKAM IA U DROKS : Ym don uwei ruh u jait droks uba wanrah jingbha ha ka jingkoit jingkhiah haka jingim jong u briew. U dei u jait jingdih u ba ktah shikatdei eh ym tang iaka jingkoit jingkhiah hynrei ha baroh ki liang. Ka jing dih droks ka pynjngai ia u briew na kiba haïng hasem, na ki paralok bad na ka imlang sahlang, ka jingbymlah ban iajan bad kiwei ka pynlong ia u briew ban bun jingmut jing pyrkhat bad kane suki suki ka ialam ia u briew sha ka depression.

3.KA JINGPYNDONKAM IA KI JINGDIH PYNBUAID : Ym tang u droks, hynrei ki jingdih pynbuaid ruh kim ju wanrah jing kmen haka jingim.Ka jing kyrni ban dih ia ki jingdih pynbuaid nyngkong ka pynsngewheh mynsyiem ia phi hynrei suki suki ka pynsngew marwei pat, bad kane ka ktah ym tang ia ka met, hynrei wat ia ka jingmut jingpyrkhat kaba kyntiew halor ka jingma ban ioh ia ka depression.

4.KA JINGTHUT JONG KA JINGKOIT JINGKHIAH : Katto katne ki jinglong jingman ki ba buh ka jingma kaba khraw iaka jingkoit jingkhiah kynthup ka jingma na ka jingpang kiba shyrkhei, na ka jing bymiohthiah bha haka por miet, ka jing ktha jur ka met lane kata kaba ki ong ka attention -deficit hyperactivity disorder (ADHD), kine ki pynjur ban nang pynbanbor haka jingmut jingpyrkhat kaba kyntiew arshah halor ka jingma jong ka jingkoit jingkhiah kaba ialam beit beit ia u briew shaka depression.

5.KA JINGDUH JINGKYRMEN HAKA JINGIM : Kane ka ju jia borabor ha man ka jingim jong u briew. Ka jingbym seisoh ha kano kano ka kam ne ka jing thmu kaba phi thmu ban leh bunsien ka pynduh jing kyrmen ia phi bad kane ka ktah shi katdei eh ia ka jingmut jingpyrkhat jong phi bad kat nang iaid ki por, ka jingbym lah ban tehlakam ia kine ki jingeh ha ka jing ialeh ka nang pynthut ia ka jingmut jingpyrkhat ka ba kyntiew iaka jingma ban shah ktah ha ka depression.

KI LAD JINGIADA BAN IALEH PYRSHAH IA KA DEPRESSION:

1.KA JINGKILAN MET: Ka jingkilan met da kaba iaid kjat kumba 15 -30 minit man la ka sngi ka long kaba don kam. Nalor ka jingiaid kjat, phi lah ruh ban shim bynta ha ki jingshad, iaid kai pyngngad ne ha kino kino ki jing ialehkai. Ki briew kiba don lypa ka depression kilah ban ym sngewtynnad ban shim bynta ha kino kino ki bynta, hynrei phi don kam ban shim bynta la ka long hakano kano ka bynta. Kane kan iarap pynduna ia ka jing banbor ka jingmut jingpyrkhat bad ka jingkhuslai. Ka jingkilan met ka pynbha ia ka jinglong ha kaba kyntiew halor ha jingpyrkhat ia kiei kiei kiba bha ki ba lah ban ialeh pyrshah ia ka depression.

2.KI JINGBAM BA TEI : Ka depression ka lah ban ktah ia ka jingthngan ka met. Ki don ki briew ki bym kwah da lei lei ruh ban bam ban dih, bad don ruh ki ba bam khlem sahngeh haba shahktah na kane ka
jingshitom. Ho’oid ka bam ba tei ka shim ia ka bynta ba kongsan ha ka koit ka khiah jong ka jingmut jingpyrkhat bad ka met hi baroh ka kawei. Katto katne ki ba lah ban pynlait iaphi na ka depression katba katto katne ki lah ban nang pynjur shuh shuh ia ka depression ha phi. Haba phi don ia ka depression kam dei kaba suk ban jied iaki bam kiba dei, hynrei ialeh shitom ban bam ban ialeh pyrshah ia kane ka jingshitom. Ha kum kane ka por phi donkam ban jied bad bam bha ia ki jingbam ba tei. Ki jingbam kynthup ia shibun ki jait soh, ka dohkha, ki symbai ka dohsyiar, ki sla jhur jyrngam bad ki nuts.Kine ki jait jingbam batai ki iarap halor ka koit ka khiah jong ka jingmut jingpyrkhat bad iarap ban pyllait na ka depression.

3.SNGEWTHUH IA KI JINGEH, WAT YM SHONG SAH HA KI :Pyrshang ban sngewthuh ia kino ki bynta jongka jingeh kiba wallam ia ka jinglong depression haphi. Haba phi la sngewthuh, pyrshang ban iakren bad kiba ha iing hasem ne bad ki paralok kiba phikir ia phi. Kren ha kata ka rukom kaba lah ban sei lut iaki jingsngew jong phi bad ban ioh jingmut pat naki. Hadien ba phi lah sngewthuh wat ym ailad ba kan shong neh haphi, pynleit jingmut ha kiwei kiwei ki kam kiba bha bad shim ia ka rai ban nang shemphang ha kiei kiei bad kiba lah ban iarap ialeh pyrshah ia kino kino ki jingialeh kiba phi ia kynduh.

4. KA JINGIOHTHIAH BHA : kane ka shim ia ka bynta ba kongsan tam halor ka jingkoit jingkhiah jong ka met ha baroh ki liang. Ka jing bymiohthiah bha ka wallam shibun ki jingpang jingshitom kaba buh jingma halor ka jing banbor ka jingmut jigpyrkhat bad kalah ban pynjur ia ka jing khuslai kaba ialam sha ka depression. Wat la phim don kano kano ka jing eh kaba lah ban ktah ia phi, hynrei na ka jing bym iohthiah bha ka buh jingeh ia ka jingim kaba pynlong ia u briew ban dom, bad bun jingmut jingpyrkhat kaba ialam beit beit sha ka depression. Pyrshang ban leit thiah ha ka por kaba biang khnang phin lah ban ialeh pyrshah ia ka jingtlot ka bor jabieng bad ban lait na shibun ki jingeh kiba phi lah ban iakynduh na ka jing bym iohthiah bha. Ki ba bun ki tnad jurup bniah ki la kdew bad pyni ba ka jing iohthiah kadei kaba lah ban pynduna ia ka jing khuslai bad wallam ka jingmut kaba thymmai. Khublei.