Ka Deoris Marbaniang ka ialam bakla, ong u Bah Latiplang Ka Kashari ka la pynksan ia ka Council

Shillong, 28 Naitung:
“Ka Kashari ka la pynksan ia ngi, kumno ngin ai license ia ki bar jylla haba kim lah ban pynbiang ia ki kot ki sla katkum ka ain”, la pynbam nia kylla u Executive Member (EM) ka Khasi Hills Autonomous District Council (KHADC) ba peit ia ka tnad khaii pateng u Bah Latiplang Kharkongor.
Haba iakren mynta ka sngi bad ki nongthoh khubor, u Bah Kharkongor u la ong ba ka rai ka Kashari ka long kaba shai ha kaba ka la kdew shai ba ki bar jylla kiba shong dukan ha jaka ba hap hapoh ka jingpeit ka Council, ki dei ban ioh ia ka trading license. “Kumno ka Deoris Marbaniang ka long jong u Paul Leong ka mut ban batai bakla ia ka rai jong ka Kashari High Court”, la ong u bah Kharkongor.
Hynnin ka sngi ka Kong Marbaniang ka la kam ba ka jop ia ka mukotduma ia ka Council hynrei dei ki nongthoh khubor ba ialam bakla bad kynnoh ba ka Council ka la leh bakla da kaba khynra ia ka dukan bad ka la kynnoh ka Kong Marbaniang ba ki briew ka Council, ki wan ban khang ia ki dukan. Hynrei na ka liang u Bah Kharkongor, u la ong ba ki briew ka Council kim shym la khang ia ka dukan, hynrei ki la phah tan ia ki tiar ba pynmih tam sha lynti iaid jong ki paidbah. “Ngi iaid katkum ka jingbthah ka Kashari bad katkum ka ain”, la ong u Bah Kharkongor.
Kumjuh u Chief Executive Member (CEM) u Bah Ardent M Basaiawmoit, u la ong ka jingkynnoh ka Kong Marbaniang kam don jingmut namar ba ka pyni ia ki kam ba la leh kam iahap satia da kaba shu tied ia ki briew ka Council da ki tiar ba nep. “Lada ngi bakla ne ngim bakla, hato ka don hok ban tied ban bom ia ki briew da ki tiar ba nep ban pynmynsaw”, la ong u CEM.
U la ong ba kane ka jingjia, ka dei ka jinghikai ia ka jaitbynriew, bay m dei ban khawpud ban tieng hynrei dei ban don ka jingiatylli bad ka jingiatreilang ka jingiarap haba iakynduh ne iohi ia kum kane ka jingshah lehbein ki paradok parasnam.
U la ong ba ka jingjia ha kane ka sngi Thohdieng, ka la pynkyndit bad ka la pynlong ia ka Council ban pyrkhat thymmai wat ban pan tiar ialeh da ki suloi ia ki briew jong ka Council khnang ban pyndem ia ki briew kiba ialeh pyrshah ia ka ain.