Shillong: U myntri rangbah ka jylla u Conrad K Sangma u la kubur ba ka don ka jing shah dawa pisa na ka seng kieng atiar Hynniewtrep National Liberation Council ia ki katto katne ki nongmihkhmat bad ki myntri sorkar.
Haba ia kren bad ki lad pathai khubor na ka liang u myntri rangbah, u la kyntait ban iathuh ba katno ngut ki nongmihkhmat bad ki minister kiba la shah dawa bad katno ki shah dawa pisa, ha kine ki seng kieng atiar.
Na ka liang u Sangma u la ong ba baroh ki sien jam ki ba la shim da ki pulit ha kine ki taiew ki bnai ki sngi ki la dep ka dei namar ba ka don ka jingphah ia ki shithi dawa pisa bad kumjuh halor ka jing shah pynbthei IED ha ka jylla.
U la ong ba ka la don ka jingbym shong suk shong shngain ia ki nongshong shnong ha ka jylla bad kaei ka ba la jia ka dei ka sien jam ka ba la shim ban pynthikna ban pynsangeh ia kum kine kam pyntriem. “La ka dei ka jingshah kem lane ka operation bapher bapher lane ka jingtohkit ki dei na ka daw ka sorkar ka ioh jingtip lyngba ka jing ujor jong ki nongmih khmat, ki MLA, ki business man bad ki riew madan, halor ka shithi dawa pisa bad kane ka la pynlong ia ngi kum ka sorkar bad lyngba ka tnad pulit ba ki la pynlong ia ka jingtohkit ka ba jur“ u la ong. U la iathuh ruh ba ka jingtohkit ka dang iaid shakhmat ha ka ba ki pulit ki la long kiba peitngor ia ka iaid ka ieng jong ki briew bad kum u myntri rangbah, u pynthikna ba shibun ki sien jam, ka la shim da ka tnad pulit ban pynthikna, ba ia kum kine ki kam pyntriem ym lah ban pynsangeh mardor.
Phi don ban ong eiei?