Ka Dawki kum ka jaka jngohkai

Shillong,
24 Rymphang: 
Ki shipai khappud Border Security Force (BSF) kila don ka jingthmu ban kyntiew ia ka Dawki ha West Jaintia Hills district bad ka Kilapara ha South West Garo Hills district kum ka jaka jngohkai ban khring ia ki paidbah.
Kane ka jingtyrwa la phah da u  Director general ha ka jingialang jong ki BSF bad ka Border Guards of Bangladesh (BGB) ba long naduh ka 18 tarik haduh 22 Rymphang ha Dhaka.
Katkum ka jingong u  Inspector General ki BSF, Meghalaya Frontier, u PK Dubey ka kam jngohkai pyrthei ha khappud kan long ban pyni ia ki ktem BSF kiba don ha khappud ka India bad Bangladesh ha Dawki bad Kilapara kiba la jied ha kane ka jylla Meghalaya.
Ha baroh ar tylli kine ki jaka jngohkai, u Dubey u la ong ba la dep phah ban don ka jingialang pyndon burom ha kane ka janmiet kum ka jingrah lama hapdeng ki shipai BSF bad BGB, jingpyni ia ki dur, ki tiar ialeh, ki jingpyni video ia ki jaka jngohkai khnang ba ki nongjngohkai kin ioh jingtip shaphang ki jaka, ka jingshngain ha lynter ki khappud, nalor ka jingshna ia ki jaka shongkai, ki jaka peitkai bad kiwei ki jingdonkam jong ki nongjngohkai.
U Inspector General  BSF, Meghalaya Frontier u la ong ruh ba ki BSF ki la dep phah ia ka jingtyrwa sha ka tnad jngohkai pyrthei ka ri ha ka jinglut kaba mar T.1 klur ban pynbiang ia ki jingdonkam ha kine ki ar tylli ki jaka ha Meghalaya, ban shna ia ki jingdonkam, kum ki painkhana, ka um, bad kiwei.
  U Dubey u la ong ba ha Kilapara, ki don ki jingsahkynmaw kiba iadei bad ka thma hapdeng ka India bad ka Bangladesh.
  U la ong ba ka jingshna ia ka jaka peitkai kan sa sdangg noh ha kaba ki nongjngohkai kin lah ban wan peit kumba long ha Wagah ha Punjab kaba don ha khappud ka India bad Pakistan.    
  U Dubey u la ong ym kum ha Wagah, ka jinglong jong ki shipai hapdeng ka India bad ka Bangladesh ka long kaba khampher namar ba ki ialong paralok.
“Ngi kwah ban pynshlur ia ka jingiadei paralok bad ka Bangladesh”, la ong u Dubey.
Ia mynta, nalor ka Wagah hapdeng ki khappud ka India bad Pakistan, kawei pat ka ktem BSF ha Akhora ha Tripura, la pynlong ia ka jingpyni nam ki shipai la pynlong ha katei ka jaka., ha kaba ki shipai ka India bad ka Bangladesh ki la pyni ia ka jingparade shipai bad ki lama jong ki ri jongki.
Ka Dawki ka don 81 km na nongbah Shillong bad kawei na ki jaka kaba long ka kad khaii, ka la sakhi ia ka jingjur ki nongwan jngohkai napoh bad nabar ri.
Ka Kilapara ha Garo hills, ka dei ka jaka kaba don ki tiar thma jong ki shipai ba la iakhun ha ka thma 1971 hapdeng ka India bad ka Pakistan kaba long mynta ka Bangladesh.