KA DAWAI LANGPIH

La thoh da u Ex.Rev.K.Langrin

Shuwa ban wan jia kiei kiei kiba shyrkhei ia ka thaiñ Langpih, nga don ka jingai jingmut ia ka KHADC, ia ki paidbah ka thaiñ, ia ki nongpynshit ia u bah Nongmynsaw bad ia u bah Raidmynsaw; bad ia ki arngut ki radbah ka thaiñ Langpih kiba long u bah Hindro Samakha bad bah Phlowing Syiem Nongbah, ba kine baroh lada ki pdiang to shim da ka dawai kyllan ba la ai kyrteng “Dawai Langpih” sa kyllan bad sop spain ia ka jingmong.

Ïa ka jinglong Syiem jong u bah Phlowing Syiem Nongbah ia ka hima Nongmynsaw la pynwit da u bah Hindro Samakha uba la long teng u Sirdar ka Raidmynsaw. Kumta kane kan ym poi shano shano ruh. Ki Nepali bad ki pulit Assam kin nang peit suh na jngai thik kum uta u myrsiang uba ap peit ia ka jingialehthma hapdeng u sniang bad u khla hyndai haduh ba ki la iap baroh 2 ngut.

Lah ban weng noh ia u shiah uba thar bad sa sop noh da ka dawai Langpih ia kato ka kjat ba la mynsaw.

U bah Hindro Samakha, watla um dei hok ban dawa ia ka kam Syiem, hynrei ka jingdawa bai khaw jong u ka long kaba dei. Namar baroh shi katta u im ja bad bsa ia la ka ïing ka seng da ka tulop Sirdar. Haba la thung syiem ia u Phlowing Syiem Nongbah, katba ia Hindro Samakha pat yn shu phah shongkhop khlem kano kano ka kam, hato un bam daei?

Katkum ka riti dustur jong ka jinglong syiem ki Khasi, u Phlowing Syiem Nongbah u don hok ban ioh long Syiem namarba u hiar pateng na u Khing Syiem Nongbah; bad ia ka post myntri bad Kongor ba ha khmat dei ban thung ia u Hindro Samakha uba long u nongwan shongkha.

Ïa ki jingmih napoh ka hima dei ban ai bynta lang ia u Hindro Samakha kumba ai ia u Phlowing Syiem Nongbah. Kine arngut kin ioh mar kajuh ka tulop.

U bah Hindro Samakha bad u bah Phlowing Syiem Nongbah ki iadei kynum. Hato kam bha ba kin pyrkhat lem ruh ia la ki khun ki kti?

Kiba pynshit ia kitei ki arngut kiba mynsaw kin sngewbha ban sangeh noh. Pynkhat lem na ka bynta ki longdien mandien kane ka thaiñ. Ma phi ki arngut kiba ialeh, to peit isynei lem ia u phlang uba phi la iuh pynlwet. Namar ka jingiatur jong phi ka pynjot ia u phlang.

Lada ia ki jingeh ba mih napoh ïing la lah ban pynjem, kyrmen ba ia ki jingeh ba wan nabar yn sa lah ban weng noh.

Lada phi kyntait ia kane ka dawai ka long kumba phi khot sngewbha ma phi hi ia ki Nepali bad ia ki pulit Assam. Te ka long kumba phi thung syiem hi ia u Boss jong ki Nepali.

Ka jingialeh markynti jong phi ka long diengpyngkiang ia ki pulit Meghalaya. Hato kin peit tang ia ka jingialeh para khasi jong phi ne kin iada na ka jingwan thom bor ki Nepali bad pulit Assam?

To ia shongsuk para khasi, bret noh ia ka jingbishni bad iarap mar kylliang haba iakynduh jingeh. Te U Blei Un iarap ia phi bad un iai kner da la ki kti.