“Ka jingbitar ka don” iathuh U Bah Carmel Sohtun MDC jong ka Laitkroh, haba la kylli da U Rupang, ia ka daw, kaba la pynlong ba un kiew halor ka miej kaba u shong mynta ka sngi, hapoh ka dorbar jong ka Khasi District Council.
U bah Carmel, uba dei U MDC, uba dang shu jop nyngkong ha ka sien 2009, na ka tiket jong ka seng UDP, ha kaba u iatreilang bad U bah Ardent Basaiawmot, MLA jong ka Nongkrem, u iathuh biang ha U Rupang, da kaba ong “Ka dei ka dak jong ka jing pyrshah ban pynduh ia ka Laitkroh Constituency”.
“Ki la nion beit da ka bor, wan rah jubor” ong U bah Sohtun, uba la kren shai ba un leit rah ia ka jingdawa ban pynkylla ia katei ka ain phiah Constituency, kaba ki mut ban pynduh noh ia ka Laitkroh Constituency, ha kaba ula ong ba un leit rah ia katei ka jingdawa ban pynkylla ia katei ka ain, hapoh ka 20tarik mynta u bnai.
La batai biang da U bah Carmel, ba katei ka dei ka ain, kaba la buh kham mynshwa ha u snem 2008, ha kaba ka iing dorbar, ka la dep mynjur, hynrei ka tnat District Council, ka la pynphai noh ha u snem 2009. “Baroh shi katto ki sngap jar” ong U bah Sohtun.
La iathuh U Bah Carmel, ba ia katei ka jingphiah Constituency, yn iatai hapoh ka 25tarik mynta u bnai, ha kaba ula ong shuh shuh “Lada ki rai jubor, ngan ong kumno” ong U bah Sohtun, uba dei mynta U MDC marwei bad u bym don liang shano shano ruh.
[na uwei pat u nong ai khubor]
Hapoh iing durbar, kiew miej u MDC ka Laitkroh ba thmu pynduh ia ka constituency
Ka dorbar mang tyngka ha ka sngi sdang jong ka KHADC ka la sakhi ia ka jingjia ba khampher haba u MDC ka Laitkroh u Bah Carmel Sohtun u la kiew halor ka miej ban pyrshah ia ka jingrai ka Executive Committee ban pynduh ia ka constituency kaba u la mih khmat la san snem.
Ka KHADC ka la thmu ban pynduh noh ia ka Laitkroh constituency ha East Khasi ban pynmih thymmai pat ia ka Umsning constituency ha Ri-Bhoi district.
Kane ka rai jong ka EC, ka la pynlong ia u Bah Carmel ban kiew halor miej ha ka por ba u CEM Bah Pynshngain N Syiem u la wanrah ia kane ka Delimitation Bills 2013 hapoh ka iing durbar hynne ka sngi.
U Bah Pynshngain u la iathuh ba ki la rai ban shna ia kane ka bill ba thymmai ban pynduh noh ia ka Delimitation Bill kaba rim kaba la pas ha u snem 2008.
Hadien kane, u Bah Carmel u la rai ban weng noh ia ka jingkyrshan ia ka kynhun ka Khasi Hills United Democratic Alliance (KHUDA) ba la ialam da ka Congress ha ka KHADC.
“Nga la wai ban weng noh ia ka jingkyrshan na ka KHUDA kum ka dak ka jingpyrshah ia ka rai ban pynduh ia ka Laitkroh bad ban kyntu ba dei ban pyrkhat arsien ia kane” la ong u Bah Carmel.
U MDC ka Laitkroh u la aiti ruh ia ka dorkhas ha u CEM ban sangeh shi syndon ban pynduh ia ka constituency.
Lah ban kdew ba bun bah ki MLA kiba mih khmat na ki 29 tylli ki MLA constituency kiba hap ha kine ki saw tylli ki district ki la kyrshan ia ka KHADC ba kan phiah ia ki constituency katkum ka MLA constituency.
La don 29 tylli ki MLA constituency ha Khasi Hills kynthup saw tylli ka East Khasi Hills, Ri-Bhoi, West Khasi Hills bad ka South West Khasi Hills.
Bun ki MLA na Khasi Hills ki la kyrshan ia ka jingmut jong ka District Council ban phiah katkum ka MLA constituency.
Ka jingpyrshah ban pynduh ia ka Laitkroh constituency ka long ba ka hap ha Sohra Assembly constituency bad la ker tawiar da ka Pynursla, Mylliem, Nongkrem bad ka Mawkynrew.
Phi don ban ong eiei?