Ka danda ki pulit bad ki nongniah taksi ha Motphran

Shillong, 28 Nailur:
Lah ar sien, une u nongthoh khubor, u iohi da la ki jong ki khmat ia ka danda jong ki pulit pyniaid kali bad ki nongniah Taksi ha Motphran.
Shi bnai mynshwa, la iohi, ia uwei u pulit, uba thoh slip ha khmut jong kawei ka taksi bad ka daw, ka long namar ba u nongniah, um iaid satia, wat haba ula bthah ba un iaid noh na syndah jong U Motphran bad uba dang khreh ban leit sha 9lad.
Khyndiat sngi mynshwa pat la iohi, sa uwei u pulit, uba tare ia la ki jong ki kti sha ka jaka ba don u shabi kali bad ka daw ka long ba uwei u nongniah Taksi, uba ieng kham ha kyndong, tangba ym don briew satia ha kali jongu bad ka dei na katei ka daw, u ieng kham ha rud ban ioh thep briew bad katei ka la pynkhih bitar ia uwei u pulit Khasi bad kumta u phrung noh da ki kti lajong sha ka jaka ba don shabi.
Halor kitei ki jingjia, na ka liang uba leh bad uba shah leh, ki don la ka jong ka nia, hynrei, ha uba peit na rud, ka wan rah noh ia ka jing ijli ba u pulit un thombor ia u nongniah Taksi bapli bad katei ka pyni ba kam don pleng kawei pat ka ain, hynrei ka dei beit tang ka kam leh jubor justi suda.
Halor kane ka phang, une u nongthoh, ula ia kren ia U Bah Disparsing Rani, uba dei u nongai jingmut jong ka East Khasi Hills Local Taxi Drivers Association bad utei u rangbah, u iathuh ba na ka liang jong katei ka seng, ki la rah ia katei ka kam thombor sha U Superintendent of Police, East khasi hills.
La ong ruh da U Bah Rani, ba ha ka sien ba la pynlong jingialang da ki pulit dang shen, ba ula ong “Haba ai jinghikai sdang shwa na iing la jong, namar ba ki pulit pyniaid kali, ki pyni ia ka akor ka burom jong ka Jylla baroh kawei”.
U Bah Rani, u ong ruh ba ka jingknieh shabi, kren khlem akor jong ki pulit pyniaid kali, ka dei kaba wat U SP hi ruh, u ju pyrshah bha, ba ki pulit pyniaid kali kin leh kumta. La ong shuh shuh U bah Rani, ba ki pulit ha Assam, haba ki iohi ba ka bos, ka la dap briew, ki ju tied da u lathi ha jingkhang jong katei ka kali, ba kan iaid noh bad kumta u ong “Ki pulit ha Asam, ki pyniaid kali, katba ki pulit ha Shillong, dei ki pulit beh kali” bad u ong ba katei ka dei ka jingleh thombor, namar ba ki nongniah Taksi, ki la siew da ka khajna ba kin iaid kamai.