“Ka CSWO ka dei ban leh shwa ka elekshon MDC”

Shillong, 20 Naitung:
Ka Lamphang ka KHADC ka Kong Teilinia Thangkhiew ka la ong ba ka jingujor ka CSWO ban pynduh ia ka jingbam ar maloi ki MDC bad MLA kam don jingmut. Ha ka jingshisha, ka la dei ban leh ia kane shwa ka elekshon ba ki paidbah kin sngewthuh.
Ka President ka CSWO ka Kong Agnes Kharshiing ka la ujor ha u Lat ka jylla pyrshah ia ka jingbam ar maloi ki MLA/MDC bad dei ban pynduh noh ia ki katkum ka Rule ka KHADC bad JHADC katkum ka kyndon Rule 17 (1) (a) jong ka Assam and Meghalaya Autonomous Districts (Constitution of District Councils) rules, 1951 ba la bsuh ha ka riti synshar ka ri ka kyndon Article 191 (1) (A). Hynrei na ka liang ka Lamphang ka KHADC ka la ong ba ka rule jong ka KHADC kam kdew ia ki nongmihkhmat paidbah hynrei ka kdew ia ki nongtrei sorkar.
“Ia kane ka mat la rah bunsien ha ki jingialang bapher bapher, balei ka mih kynsan ha kane ka por”, la ong ka Kong Thangkhiew.
“Lada long ka jingpynkhein ia ka ain, balei la shah ban thep aplikeshon ha ka por elekshon pat”, la kylli uwei u MDC. Ha ki snem ba la dep, don bun kiba bat ar maloi kum u MLA/MDC.
Uwei u nongsaid ain u la ong ba kan don ka jingshai kaba kham biang lada rah ia kane ka kam sha iing Kashari.
“Lada phi dei u MLA phim lah ban bat ark am hynrei ha ki district council katkum ka Sixth Schedule ki long laitluid ha kaba kim hap ha ka sorkar jylla ne sorkar pdeng bad ka bha ia kane ka kam, ban rai da ka Kashari”, la ong uwei u nongiasaid ain.
Ka CSWO ka la kdew ia ki 8 ngut ki MLA kiba bat kum ki MDC ruh kynthup Bah Sanbor Shullai, Bah HDR Lyngdoh, Bah Ardent Miller Basaiawmoit bad Bah Pynshngaiñlang N. Syiem ha KHADC katba ha JHADC ki long Stephanson Mukhim.