Ka Congress, kan wan biang ha ka bor, ha u 2023, ong ki nongialam

Shillong:Ka seng Congress kaba la iohi kum ba kan iap stai noh na ka jingphet ki MLA jong ka party, mynta ka kynti kane ka party sa shisien biang ka la sdang ban khie lung biang na ka jingwan phai ki nongialam barim bad kumjuh ka jingwan pyniasoh ki dkhot ba thymmai sha ka party.

Mynta ka sngi na ka liang ka Megha laya Pradesh Congress Committee (MPCC) ka la pynlong ia ka jing ialang ban pdiang sngewbha ia ki dkhot ba thymmai kiba la wan ban pyniasoh sha ka party.
Haba ia kren bad ki lad pathai khubor hadien kane ka jingialang na ka liang u bah Charles Mar ngar secretary jong ka MPCC, u la ong ba hapdeng ka jingeh jong ka party Congress na ka daw ba ka la don ka jingiamih jong ki nongialam, hynrei ka party mynta ka sngi ka la ioh ban pynskhem shuh shuh ia ki nongkitkam kiba thymmai jong ka.

“Ha kane ka jingialang la iakren ruh kumno ban iaid shakhmat ban pynkhlain ia ka party naduh ki State, ki District bad ki Block level”u la bynrap.
U bah Marngar u la iathuh ba mynta ka sngi bun na ki MLA barim ka Garo Hills bad Khasi Hills ki la wan phai sha ka party bad mynta hi ka party ka la nang bun shuh shuh ki nongkitkam ban ia nujor bad kipor ba la dep.
“Ngi la kham bun shuh shuh ki nongkitkam mynta ban ia ka por ba la leit, ha kaba ki la don ki nongialam ki ba la rim ki la wan phai bad kaba kham sngewkmen ka long ba ngi la ioh ia ki nongkitkam kiba thymmai kiba ieid ia ka party”u la ong.

Na ka liang u bah Marngar u la pynpaw ia ka jingkyrmen ba lyngba ka jingialam u bah Vincent H Pala ha ryngkat ka jingia trei shitom ki nongkitkam bad ki nongkyrshan ia ka party, ka party Congress kan lah ban wan ha ka bor marwei ha u snem 2023.
“Wat la ka don ka jingkhih phaloh na jrong, hynrei ki nongkitkam hi ki don ka jingieid ka ba skhem ia ka party bad lyngba kane ka jingkyrmen ngi don ka jingkyrmen ba ngin lah ban wan biang ha ka bor ha u snem 2023 “u la ong.
Ka party kan thung ruh da ka Committee ka ban khlieh da u President ka MPCC u bah V.H Pala ban iakren bad syllok bad ban shim rai halor ki san ngut ki MLA kiba la shah sospon.