Ka Congress, kam shym pynlut pisa, hynrei ki vote, kiba ioh dei ka jingieid ki paidbah, ong ka kong Ampareen

Shillong:Hadien ka jingshah rem ha baroh lai tylli ki konstitwensi ha kane ka elekshon shiteng samoi, ki nongialam jong ka seng Congress ki la ai daw ba ka daw jong ka jingshah rem jong ki ka dei namar ka jingtheh tyngka jong ki kyrtong ka seng NPP bad ki kyrtong ka seng UDP.

Haba kren sha ki nongthohkhubor ka kong Ampareen ka la ong ba watla ka dei ka elekshon shiteng samoi kaba ka seng Congress ka hap ban ia khun pyrshah ia ki kyrtong ba pynieng da ki seng kiba don ha ka Sorkar pynban ki kyrtong ka seng Congress kim shym la rem kput satia bad kane ka dei ka dak kabab ha na ka bynta ka elekshon MLA 2023.
“Ha ka elekshon shiteng samoi ruh ngi khlem shah rem kput, kane ka pyni ba ha u 2023 kan dei ka jingiakhun kaba itynnad bha”ong ka kong Ampareen haba kren sha ki nongthohkhubor. Nalor ka ka jingkynnoh ba ki seng kiba don ha ka Sorkar ki la theh tyngka ha ka por elekshon, ka kong Ampareen ka la kam ba ka seng Congress kam shym la pynlut pisa satia, hynrei ka Vote kaba ki kyrtong ka Congress ki ioh ka dei ka jingieid jong ki paidbah.

Sa kawei pat ka daw ba ka seng Congress ka la pyni halor ka jingshah rem jong ka ka dei ka jingphet seng jong ki MDC kata u bah Lamphrang Blah na Mawphlang konstitwensi uba la ia khun ha kane ka elekshon shiteng sasmoi na ka seng NPP bad ka jingphet seng jong u Ashahel D Shira na Rajabala uba la leit ban ia khun na ka seng UDP. Katba ia ka Mawryngkneng pat nalor ka jingtreikam ka pisa ka la kynnoh ba dei namar ka jingphet seng jong uwei u nongialam Party uba la mih ban ia khun kum u kyrtong shimet.

“Naduh mynta ka sngi hi ngin sdang treikam noh ban pynkhlain ia ka Party bad ngi kren shai mynta ba ngin pynkhuid lut ia baroh ki niut kiba pynwit hapoh ka Party”ong ka kong Ampareen haba kren halor ka thma pohiing hapoh ka seng Congress kaba la pynlong ia ka Party ban rem ha kane ka elekshon shiteng samoi. Ka kong Ampareen ka la pynpaw ruh ka jingsngewdiaw, namar ba wat la ki la leit ban pynsngewthuh halor kiba bun ki mat kiba buh jingeh ia ki paidbah kum ka jingkhaii dewiong be-ain, ka jingkiew dor ki marbam, ka jingieng jong ki khyrdop khrong khajna be-ain hynrei ki paidbah ki la kyntait ia ka seng Congress bad kane hi ka pyni ba imat ki mat ia kren kim treikam hakhmat ka pisa. “Ngin hap pyrkhat bha nangne shakhmat hato dang donkam ne-em ba ngin ia kren ia ki mat kiba buh ia ki paidbah ha ka khia ka shon”ka la ong.