Ka Congress kam lah ban iada ia ka ri India: Bah Bindo

Shillong, 07 Iaiong:
U Working President jong ka UDP u Bah Bindo M Lanong u la ong ba ka Congress kam lah ban iada ia ka ri India na u pud u sam jong ka ha kaba bun ki ri kum ka Pakistan, Bangladesh bad ka China kim khein briew ia ka India.
“Ka India ka don ha ka kti ka Congress kam lah shuh ban pynbeit ia u pud u sam”, la ong u Bah Bindo mynta ka sngi ha ka jingialap elekshon ia u kyrtong ka UDP u Bah Paul Lyngdoh ha Mot phran.
Dei halor kane ka daw ba ki paidbah ki kyntait ia ka Congress ha kane ka elekshon bad ka sa wan ka sorkar NDA ha kaba ka UDP kaba don bad ka North East Regional Forum (NERF) u Bah Paul Lyngdoh un long uwei napdeng jong ki lada u Bah Paul un jop.
U la ong ba kiwei kiwei ki kyrtong kim pat shemphang hynrei u Bah Paul u long uwei napdeng kine baroh u ba la shemphang lut ha ki kam sain hima sima.
U nongialam ka UDP na Jaintia Hills u Bah Sing Mulieh u laong ba u Bah Vincent Pala u la hiar bha ha Jaintia Hills bad u la kam ba u Bah Paul u la nang kiew ha katei ka thain Jaintia.