|
Roy Kupar Synrem,
General Secretary, Hynniewtrep Youths’ Council
Naduh ba la pass ia ka da ka Sorkar NDA u Myntri Rangbah Duh ka Ri, U Narendra Modi ha Lok Sabha ha ka 8 Tarik u Kyllalyngkot, ka Citizenship Amendment Bill (CAB) ka la pynkhihwin ia ka thain Shatei Lam Mihngi jong ka Ri India. Ha ri thor, ngim shym da iohi than ia ka jingpyrshah paidbah ia kane ka Bill, lait noh tang ki jingkynthoh ki riewsainpyrthei jong ka liang pyrshah bad kiwei de ki riewshemphang kiba la kynthoh ba kane ka Bill ka pynkhein ia ki kyndon ka Riti Synshar ka Ri India da kaba kynthoh ba kane ka Bill ka long pyrshah ia ka rong ‘Secular’ jong ka Ri India bad kumta terter.
Ha ka thain Shatei Lam Mihngi pat, ngi sakhi ia ka huri hura ba kane ka Bill ka la wanrah. La sakhi iaka jingiakhih paidbah lyngba ki pakhang shnong, pakhang surok, ki jingiaid rali, ki jingpyrta slogan ba har rukom bad ki jingshahthngan kiba long ki sienjam ban pynsngew sha ka Sorkar Kmie ba ngim mon maitang iaiap ia kane ka Bill. Kane ka sur pyrshah ka la sawa ym tang ki sengbhalang ka thain hynrei bun bun hajar ki trai ri trai muluk, la ka long ki riewshemphang, ki samla pule, ki riewsaid ain bad ki wei de. Bun bun ngut ki nongialam ki la shah kem, bun bun ngut ki la mynsaw ha kane ka jingiakhih pyrshah CAB. Ka sur pyrshah CAB ka la mih ruh na ki riewsainpyrthei jong ki parti bapher bapher jong ka thain Shatei Lam Mihngi, lait noh ha Sikkim.
Ka CAB, lada ka lait sa na Rajya Sabha, bad ynda ka long ain, kan pynjot thiaw ia ki ritpaid riewlum ka thain jongngi. Kum ka Tsunami kan sar lut ploin ia ki khyndew ki shyiap, ki iing ki trep bad ki kam ki duk jongngi sha ki sla kti ki 14 Million ki nongwei Bangladeshi ia kiba yn pynkylla nong India da ka Sorkar U Modi. Ki trai ri trai muluk kin kylla long nongwei nongkhrong ha la ka Ri ka Muluk namar ki hehpaid barri kin tam paid bunshah iangi; kin bat lakam ia ka synshar khadar, ka khaii pateng bad kumta terter.
Ki Ministar ka Sorkar NDA ki ong ba ia kine ki poiwir yn bate pynsah da baroh ki jylla ka Ri India. Kane ka long tang ka nia lamler pynbiej paidbah. Ki riewthor na Bangladesh kin niom sha ki jylla ka thain Shatei Lam Mihngi, namar ngi jan sha ki, namar ba ngi riewspah ka mariang, ki marpohkhyndew bad ki marrep markhaii.
Lyngba ki phew phew snem bad haduh mynta mynne, ngi ki trai ri trai muluk ka thain ki iai khih ki ksaid ban dawa na ka Sorkar ban wanrah ia ki ain ban iada bad pynneh iala ka hok longtrai jongngi halor ki jaka puta, ka khih ka kamai, ka kolshor ka riti, ka ktien ka thylliej bad ka nguh ka mane. Lyngba ka CAB, la set kak ia ki ryndang pyrta jongngi. Ki kyndon ka Assam Accord 1985 hato kin ym liem hakhmat ka CAB? Ka ILP ia kaba la pyntreikam ha ki katto katne ki jylla ka thain Shatei Lam Mihngi, bad ia kaba ki paid ka Meghalaya ki khih dawa, hato kan lip noh bad long wait luin hakhmat ka CAB? Dang shen , kumba 40 Lak ngut kim shym la ioh rung ha ka thup ka NRC ha Assam. Kine kin kylla long nong India ha ka khyllipmat ba ka CAB ka long ain. Nalor kine sa ki 14 Million ki ban wankiew sha ki lum jongngi. Kine kin 14 Million 40 Lak tam kin pynbaji iangi sha ki riat ba ngim lah khie. Ngin jahjait jahkyrteng na sla pyrthei.
Nud ban kam ba ka CAB ka iuhroit ym tang ia ki hok jongngi ki riewlum katkum ka Riti Synshar ka Ri, hynrei kan iuhroit ruh ia ka Hok Longbriew jongngi ha la muluk ha la bri. Ban kynther ia u trai iing, bad kdup ia u wanwir ka long ka pap bah pap sang. Bad ka sorkar NDA ka leh dashisha kumta. Namarkata, ka shonghok ba ngin pyrshah iaiap ia kane ka Bill, namar ka long ka bih ka ban pynduhjait iangi, ka long ka umsaw ka ban rong pyniapduh iangi.
Ki lum baieid ki jongngi kim dei ka jaka theh synrum ka Sorkar NDA. Palat shispah jait ki riewlum trai ri trai jaka ki don hangne hangi . Ka pyrthei salonsar ka peitieid bad jawdud ia ki rongphylla bapher jongngi lyngba ka kolshor rukom ba ngi don. Hato ka shonghok ba ka Sorkar Kmie kan pynwai noh ia kita ki rongpher ba ngi kup na ka bynta ban pynhun ia ki nongwei Bangladeshi, Pakistani bad Afghani?
Ha ka BJP, lehse kane ka Bill ka long kawei na ki rukom ban ioh synshar donbor halor ki paid NE, ha ka Congress, TMC terter lehse ka long tang ka ishu politiks ban ioh knieh i’u lakam synshar na ka NDA ia kaba la lamkhmat da ka BJP; hynrei hangi ki riewmadan paidbah traishnong kiba sngewkhia la ka long ka man bha bad ka roi ka neh ha la pneh ka bri lajong; maitang , ngim ym ailad ba yn shah iuhbein iuhroit bad pynduei hala ka bri ka jaka.
Ka por ka dawa ba ngin khih ryntih. Ki borshnong, ki sengbhalang, ki seng sainpyrthei, ki samla pule, ki seng samla seng longkmie; baroh kyllum lang, ngi don ka jingkitkhlieh bad ka kamram ban pynthikna ba ka CAB kan ym long ain. Namar lada kylla ain kane, la wai pyrthei iangi. La im la iap, la shai bneng la slap, ngin iai pyrshah ia kane ka Bill bad kumjuh kiwei de kiba donbor donbih ban ksih pyniapduh iangi, ha la ri ha la iing. Ong Em ia ka CAB! Katba ngi dang khih, ngi dang im. Katba ngi dang im, ngi dang sngew. Bad katba ngi dang sngew, ngi dang don lad don lynti, ban pynkylla pyrthei. Khublei Shibun. Khublei Shihajar Nguh. U ba burom iaphi.
|