Ka Christmas

Arban P M Tynsong, Mawkajem

Ka kyntien Christmas ka wan na ki ar tylli ki kyntien,ka ktien Greek “Christós” kaba mut u Khrist bad ka ktien Latin “Mass” kaba mut ka jinglehniam lane jingkñia.

Kumba ka paw ha ka English jong u snem 1038 la khot “Cristes Maesse”, ha u snem 1131 pat la khot “Cristes-messe”. Ha ka Ktien Dutch la khot “Kerstmis”, ha ka ktien German “Weihnachtsfest”, ha ki Ktien European Shatei lam Sepngi ki don ka tynrai “Yule” kum ha ka Swedish “Jul”, Nowegian “Julen”, Finnish “Joulu”. Ha ka Kynhun Ktien Neo-Latin, ka tynrai “Natalis” ka shong pdeng. Kum ha ka Latin ïa ka Kristmas la khot “Dies Natalis”, Italian “Natale”, French “Noël”, Spanish “Navidad”, Portuguese “Natal”. Hangne ka pyni ba ha ki jaitbynriew ba bud ïa kajuh ka tynrai-ktien, ka jingkhot kyrteng ïa ka Sngikha u Jisu ka ïasyriem bha. Nangne lah ban ringdur ba ha ka por rakhe ïa ka Kristmas ha u bnai Nohprah ki jaitbynriew bapher bapher ki don la ki jingleh jingkam ha la ki jait ki jait. Ia ka jingkha ia u Jisu la iathuh ha ki saw Gospels jong ka Bible hynrei ym don ba tip tikna ia ki tarik bad ki bnai,hynrei kaei kaba ngi tip ka long ba lakha ia u Jisu ha kibnai tlang ba khriat bha. Ka festival of light kat kum ka Calendar jong ki Jew kadei haka 25 tarik u December,ka sngikha jong u blei sngi jong ki Roman (Saturnalia) katkum ka Roman Calendar kadei ka 25 tarik December,ka Gregorian Calendar ba la pynmih da u Pope Gregory XIII ha ka snem 1582 ka 25 tarik December kadei ka Christmas,ka Julian Calendar ba pyndonkam da ki Khristan ha Mihngi (Orthodox) ka 7 January kadei ka Christmas,ka 7tarik ha kane ka calendar ka sdang tang naduh ka snem 1901 haduh 2100,lada kane ka calendar kadang bteng ka Christmas hangne kan dei pat ha ka 8tarik u January. U Jisu U dei U Jew,ki khristan ba nyngkong ruh kidei ki Jew,ki Greek bad ki Roman,ki Khristan ki pynshong nongrim ia ki jingngeit jong ki ryngkat ki riti dustur jong ki,ka Balang ka pdiang ia kiei kiei kiba bha ban pynkyntang sha u Blei namar baroh kiei kiei kiba bha ki wan na u Blei.U Jisu U dei U “Blei shisha na u Blei shisha,bad U Jingshai naka Jingshai”. U patsha Constantine udei u patsha ba nyngkong duh ban kylla Khristan bad dei ha ka por jong une u patsha ba u Pope Julius I ha ka snem 336 AD ula declared iaka 25 tarik December kum ka sngi Christmas. Ki jing ia ai sngewbha ha ka por Christmas kala sdang nyngkong eh ha ka por u Bishop Nicholas (270–343 AD) jong ka Myra (Turkey),une u Bishop u ju leh ki kam isynei ia ki briew ha ki aiom Christmas bad u ju ai ki jingaisngewbha,u riam da ki riam kiba ki briew kim lah ban ithuh ia u namar um kwah burom,da ka jingsngewrit jong u ula leh shibun ki lad jingiarap ia kiba duk.Ka Balang ka la ithuh ia u kum u riewkhuid,u St Nicholas dei na kane ka daw ba ki briew ki ong u Santa Nicholas lane u Santa ‘Claus ia lane ki Father Christmas mynta. Hynrei balei pat ba ïa kajuh ka Sngikhraw la khot da ki kyrteng bapher bapher ha ki Ktien bapher bapher? Kawei na ki daw ka lah ban long ba kane ka Sngikhraw kaba la pynlong ha u bnai Nohprah ka ïashei bha bad ki Sngiburom bad ki jingleh jingkam bakyrpang jong kine ki jaitbynriew bapher bapher, ha ki Ri jong ki ha u bnai Nohprah kumba nga la ong ba ka Balang ka pdiang bad ka iaid ryngkat ryngkat bad ki riti dustur jong kano kano ka jaidbynriew bad ia kine la pynkyntang sha u Blei namar baroh kiei kiei kiba bha ki wan na u Blei.Na kata ka daw ba nalor ka jinglehniam Kristmas ha ki Ïingmane, manla ka jaitbynriew ka don la ki Khana pateng la pateng shaphang ka Kristmas ïa kiba la khot ha ka ktien English ‘Secular celebrations of Christmas’.

Ngim lah ban len ba ha kano kano ka Jinglehniam jong ki niam bapher bapher kan don beit ka jingsnoh-lang bad ka tamasha.Ha kiba bun hi ki khep, ki riewpaidbah ki kham kynmaw ïa kine ki tamasha basnoh-lang ban ïa ka Jinglehniam.Kampher ei ei namar ka jinglongbriew ka pynlong ïa ngi ban long kumta.Katto katne na ki tamasha bad ki khanatang kiba ïasnoh bad ka Jinglehniam Kristmas:

Ka Shyngoid: Ïa ka dustur ban buh shyngoid la sdang nyngkong eh da u Francis Assisi,u Nongseng jong ka Seng Franciscan.Ki snem jong ka jingim jong u ki dei ki snem ‘Crusaders’.Wat hapdeng ki jingeh,u Francis u la thong im thong ïap ban leit sha ki Jaka kyntang ha Palestine hapdeng u snem 1219-1220 bad u la duwai puson ha Bethlehem. Lyngba ka jingsngewrit u la lah ban ïadei paralok wat bad u Sultan Al-Kamil jong ka Ri Egypt uba la bitar bha ïa ki Kristan na ka daw jong ka jingkerkut ki shipai Crusaders ha Damietta.Ha u snem 1223, ha ka Nongrit Greccio ha Italy u la shna ïa ka Shyngoid banyngkong ban pynwan-urlong biang ha ka jingmut jingpyrkhat ïa ka Jingkha ïa U Jisu ha Bethlehem. Naduh kata ka por ka jingshna Shyngoid ka la sdang pur ha ka dustur Kristmas.

U Santa Claus: Santa Claus kumba la kdew haneng (Dutch: Sinterklaas) la ong ba u dei u Bishop Nicholas jong ka Myra (mynta Demre) ha Lycia, Turkey.U Nicholas u la long uba pawnam ha ki kam leh-isynei ïa ki duk ki rangli.La ong ba u la ieid bha ïa ki khyllung khynnah. Kumta ha la Ki Ri bapher bapher ki ngeit ba u dei u Nongwan-ai jing-ai-sngewbha khamtam ïa ki Khynnah rit.

U Dieng Kristmas: Ïa ka jingsdang-buh ïa u dieng Kristmas ym lah ban ong thikhna. Kiba bun ki kubur ba la sdang ban ïohi ïa u Dieng Kristmas ha ka por Kristmas ha ki spah snem ba 16 – 17. Katba nang ïaid ki por, u dieng Kristmas u la nang kit jingmut shibun namar u pynkynmaw ïa ki Kristan ïa 2 tylli ki Dieng: u Dieng ka kper Eden lyngba uba u Adam bad ka Im ki la pynkheiñ aiñ U Blei; bad u Dieng ka Kalbari lyngba uba U Jisu u la pyllait im. Kumta da kaba pynriam ïa u Dieng Kristmas ka pynkynmaw ba kumba ka jingtim ka la wan lyngba u Dieng-adong, kumta ruh ka jingpynim ka la wan lyngba ka Diengphna.

U Khlur Kristmas: Ka jingwah ïa u Khlur Bethlehem ne Khlur Kristmas ka dei ka dustur ban pynkynmaw ïa ka jingmihpaw uwei u khlur ba lam lynti ïa ki Riewstad na Ri Mihngi shaduh sha shnong Bethlehem ban leit mane ïa U Khunlung Jisu.

Ki Jingrwai Karol: Katkum ki thymmei babun, Ka kyntien “Karol” ka lah ban wan na ka Ktien Greek “Choraulein” (Chorus=Jingshad; Aulein=Ban tem Besli). Ka lah ruh ban wan na ki Ktien Latin “Choraula” bad Old French “Carole” kiba mut ka ka Jingrwai-shad sawdong sawdong. Shaphang ka jingsdang ïa kane ka rukom rwai-shad ka lah ban wan na ka jinglehkmen ïa ka sngiburom Tlang “Winter Solstice” ha ka por ba ki Jaitbynriew ha Europe kim pat long Kristan. Ki jingrwai Karol ki la nang kham pawnam shuh shuh hadien ba u Francis Assisi u la pynshlur ha u snem 1223.

Ki Card Kristmas: La ong ba ïa ka Card Kristmas banyngkong eh la sdang da u Nongdro na London ba dang 16 snem, William Egley ha u snem 1842.. Ha kajuh ka spah-snem la ong ba u Sir Henry Cole u la hukum ïa u Nongdro ba kyrteng John Calcott Horsley ban shna ïa ki Card Kristmas khnang ba un ïoh phah ha ki paralok bad ki marjan marpa ban khublei “merry Christmas” Tangba kim pat la mih ha ïew tad haduh u snem 1860. Naduh u snem 1868 te ki la nang bun nang bun.

Ka Peit-miet Kristmas: Ka dustur jong ka jingpeit-miet Kristmas ka wan na ka jinglehniam Kristan kaba shait sdang ha ka por sepsngi shwa ka Sngikhraw kaba bud na ka dustur ki Jiw. Na kane ka dustur sa mih ki Jingrwai “Heilige Nacht” “Holy Night” “Miet bakhuid” “Por shiteng miet Kristan ka dei por khuid”

Katto katne ki jingleh-jingkam dustur Kristmas ha Ri HynñiewTrep:

Ki Baje Kristmas: Ka long shisha kaba sngewthiang ban ïohsngew na ki Ïingmane bapher bapher ïa ki baje kiba tied ha ka miet 24tarik , ha la ki sur ki sur ki kylla long ki sur jingrwai “Dingdong merrily on high, in heaven the bells are ringing”.

Ka Bamkhana Kristmas: Ha kiba bun ki bynta jong ka Ri jongngi, ka Bamkhana Kristmas ka dei ka bynta ha kaba ki Shnong, ki Dong, ki Kyntoit, ki Balang shnong bapher bapher ki ïasnoh-kti lang ban pyni ïa ka Jingkmen bad jingïalong kawei. Don kiba leh ïa kane ka Bamkhana ha ka Sngikhraw 25tarik Nohprah. Don pat kiba leh ïa kane ha kiwei pat ki sngi jong ka aïom Kristmas. Kaba sngewtynnad eh shaphang kane ka long ba lada don ki longïing ki bym lah ban noh synñiang katkum ba la buh, kiwei ki ïarap lem khnang ba kita ki longïing kin ïoh bynta lem ha ka lehkmen Kristmas.

Ka Shad-lehkai Kristmas: Ha kiba bun ki thaiñ jong ka Ri jongngi, khamtam ha ki thaiñ Maram ka don ka dustur ha kaba ha manla ki shnong ki don ki jingïalehkai Kristmas ha kawei na ki sngi jong ka aïom Kristmas ha kaba baroh kin ïawan ha ka por sngi ban ïashad sawdong sawdong ka Ïingmane, nangta ïabam Khawai Kristmas bad ha ka por mieit hapoh ka ïingdara baroh shimiet, naduh por sep sngi haduh por mih sngi. Kumta ki Nongpeitkai ki hap shong hapoh ka ïingdara ha ryngkat ki jaiñkup basyaid bha. Ha kum kane ka jingïalehkai ka shait don kawei ka Drama ka bajrong bha ha ryngkat ki jingshad bad jingbiria ha manla ki por ba khang ïa ka pyrda pynkhreh. Ki shnong ba marjan ki ïaleh katba lah ban ym buh Jingïalehkai Kristmas ha kajuh ka Tarik namar ki Nongpeitkai ki kwah ban leit na kawei ka shnong sha kawei ka shnong.

Ki Syntiew-soh Kristmas: Kine ki syntiew ki kham ñiar eh ban shem ha kiwei pat ki bynta jong ka Ri India. Ki ïasyriem shibun ïa ki syntiew ‘holly’ ha kiwei pat ki thaiñ jong ka pyrthei.Tang mar syn ïohi ïa kine ki syntiew, hapoh ka mynsiem jong u babun-balang ka lyer Kristmas ka beh. Kine ki syntiew ki long shisha ki muhor Kristmas jong ka jaitbynriew jongngi. Ha ka por tlang ha kaba ki syntiew ki skud baroh ki la tlor, kine ki syntiew Kristmas ki jyrngam ryngkat bad ki soh kiba saw huiñ huiñ ki pynkhie-im ïa ka aïom. Kine ki syntiew ki dei shisha ki paralok ha ka por tlang namar labiang ïa ki ban buh ha ki khiew syntiew ryngkat bad ka um ne ha ki jaka sngem bad kumta ki sla jong ki ki neh slem bha ha ka jingjyrngam.

Ka Kristmas ha Bethlehem kumba shait leh ha kine ki por:

Ha ka Nongrit Bethlehem, ka Jaka ha kaba la kha ïa U Jisu, mynta la don ka ka Ïingmane “Church of the Nativity” bad ka “Manger Square”. Ïa kane ka jaka la shait pynriam bha da ki lama bad da ki laiphew jait ki jingpynriam manla ka por Kristmas. Ha ka Miet Kristmas Ki Riewngeit na kylleng ka pyrthei ki dap smam ha kane ka jaka. Don kiba ïeng na tnum ïing ban ïohi ïa ka Jingïaid Proseshon. Ki Nongshong kulai Arabia bad ki Pulit ki ïalam shakhmat. Sa bud ïa ki da kiwei pat ki Nongshong kulai kiba rah ïa ka Diengphna. Nangta bud sa ki ki Nongsharai Balang bad ki briew Sorkar. Ka proseshon ka rung hapoh Ïingmane bad buh ïa ka Stashu jong u Khunlung Jisu ha ka Shyngoid. Nangta ka sdang ka Jinglehniam Peit-miet Kristmas. Manla ka ïing Kristan ki pynriam da ka shyngoid bad u khlur. Ïa u khlur uba heh la pynïeng ha Manger Square. Baroh ka shnong Bethlehem ka dap da ka mynsiem Kristmas, lada dei Muslim ne Kristan. Don kiba ïarwai Karol ha Pyntha ki Nongaplangbrot “Shepherd’s Field”, don kiba ïarwai Karol ha “Manger Square” bad ha kiwei ki jaka. Ki Ïingbasa ki dap da ki Riewngeit na kylleng ka pyrthei. Ka jinglong jong ka shnong ha kane ka aïom la sngew kumba ha ka jingïathuh ha ka Kospel.

Ki snem ki la ïaid, ki snem kin dang wan. Lano kane ka jingïashrai, jingïakynad Israel-Palestine kan kut? Ha ka Kristmas jong ka Mynnor ha Bethlehem ym shym la don jaka shuh ïa ki ha ki ïingbasa (Lk. 2:7); ha ka Kristmas jong ka Mynta hato dang don jaka mo ïa ki trai-shnong ha ïing lajong? Tang kawei kaba donkam bha ka long ba ngin duwai na ka bynta ka jingsuk ha Bethlehem bad ha baroh kawei ka Ri Israel-Palestine.

Christmas Basuk bad ai ba u Snem Thymmai un wanrah jingsuk jingkmen iaphi baroh bad ngin ioh mad ia kiei kiei kiba bha kat kum ki saiñdur ki jong u Blei.