Ka China ka dei ban bud ia ka India, ong u nongialam ka Tibet

Shillong, 3 Rymphang:
U nongialam myn siem ka Tibet u Dalai Lama u la ong ba ka ri China ka dei ban bud ia ka India, kaba pdiang ia baroh ki jaitbynriew bad ki jait niam, hynrei kane kam dei pat ba kwah ban ia lait ne iapra noh na China.
Haba kren ha ka jingpynkup burom jong ka Martin Luther Christian University (MLCU) kaba long mynta ka sngi Nyng kong ha U Soso Tham Auditorium, u Dalai Lama u la ong ba ka China ka dei ban ioh jinghikai na ka ri India kaba pdiang bad kdup ia baroh ki jait bynriew, ki ktien bapher bapher ban iaim iasah lang.
Ha kane ka jingpyn kup burom la don lang u Lat ka jylla u KK Paul, u Myntri Rangbah ka jylla u Mukul Sangma nalor kiwei ki heh ki hain bad u vice chancellor ka MLCU u Bah Robert G Lyngdoh.
Ka India ka long kum ka iing sah jong u Dalai Lama bad kane ka dei ka sien ba nyngkong ia une u nongialam Mynsiem ka Tibet ban wan iuhkjat ha kane ka nongbah ka jylla Meghalaya. U Dalai Lama u la ianujor ia ka India kum ka United Nation kaba pdiang ia baroh ha ka.
“Kane ka dei ka jingkhraw ka India kaba long ka nuksa ia kiwei ki ri ha ka pyrthei”, la ong u Dalai Lama.
U la ong “nga iathuh ia ki nong-China. Ki dei ban ioh jinghikai na ka India bad u la kynnoh ia ki riew khim jingmut ka China kiba thung ia u symbai ka jingisih ia ki paidbah ka Tibet.
U la kyntu ia ki paidbah ban kiar na ki kam sniew ki kam runar kiba pynkha ia ki jingiashun para bynriew. Ka bor jong ka suloi, ka bor jong ki bor shipai, bad ka bor jong ka jingiashun, kim neh slem hynrei dei ka jingsuk kaba neh”, u la ong.