Ka CAB, ka dei na bynta ka jingthmu elekshon? kylli ka Sheikh Hasina

Ka Sheikh Hasina, myntri rangbahduh ka Bangladesh, ka la kynthoh ba ka kam sngewthuh  satia balei ba ka sorkar India, ka kwah ban wan rah ia ka ain  Citizenship (Amendment) Bill, 2016 (CAB) bad nangta sa kaei ka jingmut kaba don hadien jong katei ka ain.

Ka Hasina, ha ka jingiakren bad ka Gulf News ha ka nongbah UAE, ka la kylli “Balei kane ka bill, ngam sngewthuh satia ia ka jingmut jongka”.  Ka la ong shuh “Ka dei namar ka jingthmu elekshon?”.

Ka Hasina, ka ong “Ngam tharai ba kan long kumta, kam don satia ka jingleh bein ia kiwei pat ki niam ha Bangladesh. Ki don katto katne ki jingjia, hynrei ngi la tian bishar mar mar”. Ka Hasina, ka ong shuh shuh, ba ka jing ialeh pyrshah niam bad ka kam lehnoh, kam dei kaba jia tang ha Bangladesh, hynrei ka dei kaba jia ha satlak pyrthei bad ka ong shuh “Ki briew ha India, kim mon satia ia kane ka bill”.