Ka CAB bad ka NRC, ka nuksa na Assam

Bah RM Shabong

Ngim tip shuh ia kaei ka jingmut jong ka sorkar BJP, haba ka pyn trei kam ha kajuh ka por, ia ka Citizenship Amendment Bill (CAB) bad nangta ia ka National Registration Certificate (NRC).

Ka nuksa kaba rit duh ka long, ba na ki 19lak ngut ki poiwir, kumba ki la lap ha Assam, kumta shaei kin leit bret ia kitei ki poiwir, nangta kin leh kumno ia ki khun, ki ksiew jongki, kiba la kha ha India bad kiba dang kha haduh ha kine ki sngi bad kam dei tang katta, namar ba lada kitei kiba shah kyntait ki dei ki khar Bangladesh, kumta ki dei ban leit bret sha katei ka Ri, hynrei, haba katei ka ri, kam treh ban pdiang, kumta shaei kitei ki phew lak ngut kin leit?

Katba ka jingiakren, ka dang iaid ban bret ia kitei ki phew lak ngut na Assam, mynta ka wan sa kawei ka jingmut bad kata ka long ban pynrung ia ki 20klur (lada ka jingkhein ka biang), kiba don ha Bangladesh, Afghanistan bad kumta ter ter bad kumta, lada ka India, ka don briew mynta shi billion ngut, kumta ha ki khyndiat bnai ban sa wan, kan sa nang bun sha ka shi billion tam eiei.

U Amit Shah, myntri kam poh iing ka sorkar India, u ju kren kob, ba un bret ia kitei ki poiwir ha shwa u snem 2024 bad lada u thew ia u snem 2024, ka la dei ba un sdang shwa ban bret ia ki 19lak ngut na Assam, kiba la dep rai da ka NRC, ba kim dei ki nong India ba pura bad lada la lah ban bret ia kitei sha Afghanistan, Pakistan, Bangladesh lane sha kino kino ki Ri, kumta yn sa nang lah ban bret sa ia ki phew lak ngut kiwei pat, ha ka por ba pynkhreh ia ka NRC 2024.
Donbok haduh mynta, ba kim pat don ki Ri, kiba pyrkhat ia katei ka buit jong ka India; hynrei lada jia ba ka Bangladesh, ka shim ia katei kajuh ka jingmut bad nangta sa ka England, ka America, kin shim ia katei kajuh ka jing pyrkhat, kumta khlem pep, kiba bun bah ki Khasi, ki Garo bad kiwei kin hap ban mih na Bangladesh bad kitei ngim tip shaei kin leit bad kam kut tang katta, hynrei sa ki khar Delhi, ki khar UP, ki khar Gujarat, kin hap mih na US, UK bad hangtei ngim tip shuh ia kaei ka ban sa jia ha ka shong ka sah ha ka pyrthei hi baroh kawei.