Ka CAA, kan nym treikam satia ha ka jylla Meghalaya

Shillong: Ka tnat kam poh iing jong ka sorkar India, ka pyntip, ba ka Jylla Meghalaya, kan nym hap satia, hapoh ka jylli treikam jong ka CAA 2019 bad la pynshai ba ka ain jong ka CAA, kan nym ktah ia ki jaitbynriew rit paid riewlum kiba don ha ka jylla Meghalaya bad la ong shuh shuh ba ka CAA, kan treikam hapoh ka khyrnit ba hynriew jong ka riti synshar jong ka Ri India bad la ong b ki kyndon ban kham pynkhlain shuh shuh ia ki District Council, kiba hap hapoh ka khyrnit ba hynriew, ki dang iaid shakhmat. Yn nym shah ia kine ki nongbuhai shnong, na kitei ki Ri, ban shong ban sah ha ki jaka ba hap hapoh ka khyrnit ba hynriew bad ka CAA, kan nym shu ai syrnot ia baroh kine ki nongbuhai shnong, ban long ki nongshong shnong, khlem ki sakhi sabut ba pura. La ong shuh shuh, ba ka sorkar India, ka shim khia ban iada ia ka hok bad ka jingbit jingbiang jong ki jaitbynriew rit paid jong ka thain shatei lam mihngi bad ruh ban pynpoi ia ka roi ka par, lyngba ka Act East Policy.