Ka CAA, dei ka politik tad dor jong ka BJP, ong U bah Ronnie

Shillong:U Nongialam ka Congress Legislature Party (CLP), u Bah Ronnie V Lyngdoh u la ong ba ka jingpyntreikam ia ka Citizenship Amendment Act (CAA) shwa ka elekshon sha ka Lok Sabha ka dei ka politik tat dor jong ka BJP ban pharia ia ki paidbah ha ka kyrteng jong ka niam.

U la ong ba ka seng Congress ka pynrem ia kane ka jingleh bad kan pyrshah ia kane ka aiñ jong ka Sorkar India, bad u la kyrpad ia ki paidbah ka ri India ba ki dei ban jied ia ka party kaba ailad ban mane blei laitluid, ka ban iada ia ka riti synshar bad ka ban pynneh ia ka synshar khadar paidbah.
“Ka CAA ka dei ka jingleh politik tad dor ka BJP, ban khring vote ha ka kyrteng jong ka niam”, la kynnoh u bah Ronnie.

Haba kylli halor ka jingpynbna jong ka Sorkar India ba ia ka CAA la pyllait na ka jingpyntrei kam ha ki jaka ba hap hapoh ka Sixth Schedule, kynthup ia ka Jylla Meghalaya, u MLA ka Congress u la ong ba donkam ban pynpaw ia kane ha ki kyndon (rules) jong ka CAA, hangta yn sa ngeit ba la pyllait shisha ia ka CAA na ki jaka jong ka Sixth Schedule.