Nongpoh: Ka District Magistrate ha Ri Bhoi, ka la pyntip paidbah ba ka Byrnihat Police Outpost bad ka Primary Health Centre ha Umden, ki la shah pynhap ha ka thup Micro Containment Zone, kaba la sdang naduh ka 15 tarik haduh 25 tarik mynta u bnai. Nalor kitei ki jaka treikam sorkar, ka shnong Sohkyrbam Domphlang bad kumjuh ia lai tylli ki longiing hapoh ka shnong Iewmawlong ha Nongpoh, kin ngat ha katei kajuh ka thup.
La pynhap ia kitei ki jaka ha ka thup Micro Containment Zone, ka dei hadien ba la lap ba ki don ki briew kiba la ioh ia ka jingpang khlam COVID-19. Kumta na ka bynta ban khanglad ban saphriang stet katei ka Khlam, ia mynta shipor yn khangdam shwa ia kitei ki jaka ba la kdew hangne tad haduh ban da pynbna da kumwei pat.
Kumta la maham pyrshah ia ki briew ba kim dei ban rung ban mih ha kitei ki jaka ba la pynbna Micro Containment Zone bad kiba leh pyrshah, kin sa shah pynshitom katkum ki kyndon Ain.
Phi don ban ong eiei?