Shillong:Ka seng Hynniewtrep Border Disputed Redressal Forum (HBDRF) ka la pynrem jur ia ka jingkren u myntri rangbah ka jylla Assam u Himanta Biswa Sarma ba ka Byrnihat ka dei jong ka Meghalaya bad ka Assam ruh.
Haba kren mynta ka sngi, ki nongialam ka HBDRF kynthup u chairman bah Chandame Sungoh bad u nongaiktien u bah Thomas Passah kila ong ba kane ka jingkren ka mut ba ka la mih sa kawei ka jaka ba iakajia. Ki la ong ba lada ka sorkar Meghalaya ka pynjem shi pynjem ia kane, ym slem shuh ka Nongpoh, ka Umsning ruh kan sa kylla ka jaka ban iaknieh bad ka Assam. U Bah Thomas u la ong ba haduh mynta ym pat iohi ia ki myntri sorkar ka Meghalaya kin pynphai ktien eiei halor kane ka jingkren u myntri rangbah ka Assam ban ong ba ka Byrnihat kam dei ha ka jaka ba iakajia.
Ki nongialam ka HBDRF ki la aiti shithi mynta ka sngi ha ka ophis u myntri rangbah u Conrad K Sangma ba ka Regional Committee jong ka West Jaintia Hills kam shym la leit pruid dak ia u pud u sam ha Block-I sha ki shnong ban ioh ia ka jingshisha bad kawei pat ka la kyrpad ia u Myntri Rangbah ban pyllait por ban iakynduh ia ki nongialam ka HBDRF ban iakren halor ka Block-I bad kumjuh ka Block-II.
Ha kajuh ka por, u bah Thomas ula ong ba kaba sngew sih ka long ba ka sorkar jylla Meghalaya kam ju ai kano kano ka jubab sha ka seng wat la ka la phah shithi la bunsien sha ka sorkar halor ban iada ia u pud u sam.
Ha kawei ka liang, u chairman u bah Chandame ula ong ba ka seng ka kwah eh ban iakynduh bad u myntri rangbah ka Meghalaya khnang ban iathir ia kane ka kam ha ka rukom kaba dei. U la ong ba ka seng ka la khot sngewbha ia ka sorkar ba kan pynbeit sngi ban iakynduh ia ki nongialam ka HBDRF ban iakren ym tang ia ka thain Khanduli, Psiar hynrei ia ka Block-I bad Block-II.
Phi don ban ong eiei?