KA BYNTA BA LA BUH DA U BLEI BAN IAID LYNGBA

Rev.B.P.Pohsngap

Ai khublei ia phi iwei pa iwei baroh, kiba ieit ban pule ia ki khubor na ka por sha ka por. Ngi im ha kane ka sla khyndew ba U Blei U la pynwan long briew ia ngi, U la buh ia ki aiom ia ki por, ba ngi dei ban iaid lyngba. Kumba ngi long khunlung long khynnah, long samla, long rangbah bad poi jinglong tymmen poi shaba kut. Kawei pa kawei ka sngi ngi iap ka sngi jong ki rta, ba kam lah phai dien shuh hynrei ka kiew man ka snem ban poi shaba kut.

Ngim lah da leilei ban ong, ko rta jong nga to sangeh teng, ba ngan nym poi kloi shaba lut ki rta jong nga. Ki bynta ba la buh U Blei ngin hap iaid lyngba, ym don uwei ruh ban ioh da kawei pat ka lynti, ba dei ban iaid lyngba. Kawei na ki bynta kaba khrawtam ba ngin nym klet kaba ngi dei ban iaid lyngba ka dei “KA JINGIAP” (Death).

Ia kane ym don uba lah ban ialeh pyrshah. Hooid ngi pyrshang da ki lad baroh, ban iada pyllait ialade na kano kano kaba ngi tip ka ban ialam sha ka jingiap, hynrei ngin lah tang halor kaba U Blei Um pat mon ne ym pat poi ka por ba la buh hi da U Blei. Kane ka jingjia kaba wan ha ka pyrthei mynta kaba la ia sheptieng baroh baroh dei ban sumar hynrei ban khlad hi u briew na ka sla pyrthei, dei ka bynta ba la buh hi da U Blei. Katto katne ki bynta ba ong ka ktien U Blei:

1. Ka jingiap ka dei kaba la pyntikna : kaei kaei kaba la pyntikna, wat ha ka longbriew man briew ruh shisien ba la pyntikna, ka la dei ban long beit. Ka kitab U Job ka ong 14 lynnong Dkt.5 “Namar ba la pyntikna ia ki sngi jong U, ka jingkhein ki bnai jong U ki don bad Me, bad Me la buh ia ki pud jong u ba um lah ban ryngkang” kum ki briew haba ngi sheptieng ia ka jingiap, ka mut ngi tieng ia kaba U Blei U la buh hi. Hoid ngi dei ban sheptieng khnang ba ngin nang ban sumar ha ki jingjia baroh. Kane ka bynta ne ka bhah jong uwei pa uwei u briew un ioh ia ka ynda la dei ka por ba la pyntikna da U Blei, kumba ong ka Salm U Dabid 89:48, “Uno uta u briew uban im bad u ban nym iohi ia ka jingiap, u ban pyllait ia ka mynsiem na ka bor ka niamra?”
2. Ka jingiap ka dei kaba la iatip lang da baroh : kane ka paw ha ki riewblei hyndai ba ki la tip hi ba kin sa iap wat la ia ka sngi kim tip pat lano. U Jakob (ba la khot Israel hadien) ha ka jingtynjuh ba kthang ba u la mad, ynda u la ia shem pat bad u Joseph u khun uba u ieit eh , u ong, ba nga la iohi pat ia ka khmat jong Me, “To ngan wat iap mynta, ynda nga la iohi ia ka khmat jong Me, ba me dang im shisha Jen 46:30. Kane ka pyni ba U Israel u tip ba un sa iap wat la um tip ia ka por. U Job ruh uwei na ki riew khraw ha ka Bible, u tip ba un sa iap wat la um tip ia ka por. Job 30:23 u ong “Naba nga tip men ialam ia nga sha ka jingiap, bad ha kata ka iing ba la buh ia kiba im baroh”. Kane ka jingsngew na kawei pa kawei ka mynsiem ka iai don da kaba pyrkhat bad tip ba shisien ka sngi yn hap ia kynduh bad ka jingiap ban ia khlad ka met bad ka mynsiem.
3. Ka jingiap ka dei ka por ai ne iehnoh ha kiwei ia ka spah : U Jakob u briew jong U Blei U tip tikna shen kan wan poi ka por kaba un iehnoh ia la ki khun baroh kiba U Blei U la ai ha U, bad ia ka spah kaba U don U la bynta ia ka ha ki khun. Jen49:1. Ki longkmie longkpa ki ba leh bha, ha shuwa ba kin iehnoh ia ka pyrthei, kane ka long ka kam kaba donkam eh na ka bynta ki khun. Don ki kmie ki kpa ki bym pyrkhat jngai, kim leh ei ei ia ka spah ka phew ba ki don, ynda la khlad kyndit, ki khun ki ialeh thma shipara, tang ba ia knieh spah. Hynrei kiba shai kiba sngewthuh ka dei ka lynti kaba dei eh ban leh ia kata ba ka pateng kan suk. Ia kane ka bynta ba la buh da U Blei ym don ba lah ban kiar ka dei kumba ong U Dabid ha ka salm 49:10, “Kiba iap ki iehnoh ia ka spah ha kiwei.”
4. Ka jingiap ka dei ka nongshun kaba khadduh jong u briew : Namar ka dei ka bynta kaba la buh hi da U Blei, ym don mano mano ba lah ban ialeh pyrshah ia ka. U Nongiathuh khana Ekles 8:8 u ong “Ym don u briew uba don ka bor halor ka mynsiem ban bat ia ka mynsiem , lymne uba donbor halor ka sngi ka jingiap”. Ha ka jingim don shibun kiei kiei kiba u briew u dei ban iaid lyngba, bad haba u ia kynduh ia ka pang ka jhia, u ialeh ban sumar katba lah namar ka dei ka kamram ban sumar hynrei ynda lah poi ka por ba la buh bynta U Blei kata ka kylla long noh kum ka nongshun kaba khadduh. Ong u Apostol Paul sha ki Nong Korinth ba nyngkong ka lynnong ba 15 Dkhot ba 26, “Ka nongshun kaba khadduh ia kaba yn sa pynduh ka long ka jingiap”.

Kane ka bynta kaba la buh U Blei ban iaid lyngba, ka dei tang shisien hi. Kumba la buh ban kha shisien , la buh ruh ban iap tang shisien, kumba ong ka kitab u Ekle 3:1-3, “Don ka aiom ia kiei kiei baroh, ka por ban kha bad ka por ban iap”. Ka shithi sha ki Hebru 9:27 “Te kumba la buh ia u briew ban iap tang shisien bad hadien kane ka wan ka jingbishar”.
Ko ki lok ki jor ki para mynsiem baroh to ngin tip ia kane ka jingshisha kaba khraw, ka bynta ba la buh U Blei, ba haba ngi tip bad sngewthuh ia kata baroh, to ngin puson kaei kaba ngi dei ban leh, namar ngim lah lait na kane, ka donkam tang ban pynkhreh bha ioh lap ba wan ka por ne ka nongshun ba khadduh ban poi sha kaba kut. Sngew synei ia ka jingim briew, ba wat hadien ba la dep iakynduh ia kaba kut, yn sa bteng pat ia ka sngi bishar ia ki jingleh baroh, la bha ne la sniew. To U Trai Un kyrkhu ia kane ka khubor . AMEN……