Ka burom U Blei, ha kiba jrong tam, ka jingsuk ha ka pyrthei bad ka jingbha ha ki briew baroh

Lamthij Garod

Ka por ka iaid stet thir – thir haduh ba ngim poi kynmaw shuh da kumno une u snem u sdang bad da kumno un kut noh. Ngi sngew ialade kumba ngi long, pynban ngim da sngewthuh bha ba u 2020 ruh u la hajan. U briew uba don mynta 19 snem lashai un poi 20. Teng teng ngi sngew halade ba baroh ki 365 sngi ngi shu shongthait bad ngi khlem leh ei ei.

Yn sa kyrdep noh ia ka jingkhang jong ki 365 sngi ban ia khublei bad ia khlad khatduh bad u 2019. Ha ka jingtyllun jong kine ki sngi don kiba la mad ia ka jingkmen, ka jingsngewbha bad shembha, kiba long bad kiba lah ruh ban ong ba ki long ki jingkyrkhu jong ka jingim.

Dei ruh ha ki shalyntem jong ki la ioh mad ia ki jingeh jingjynjar, ki syrdoh bajwat, ki sohsat bathain, ki khuslai bad ki ummat ba kthang jong ka jingim. Pynban kine baroh ki long kiba ngim lah lait.

Aiu ngi la leh ha u snem 2019 bad kiei shuh kiba ngin sa leh ha u snem 2020. Ka shong ha ngi marwei shimet ban jubab ia kata. Une u snem un sa leit noh hi ha kaba ngin ia khlad jynduh bad ha kaba ngin pdiang pat da kaba sngewbha ia uba thymmai. Ha ba kumta, to pynthymmai bad pynjanai shuh shuh ia la ki jong ki jingim kumba u snem ba thymmai ruh u la jan wan ha ngi.
Kumjuh ruh, shisien ha ka sngi snem man la ka snem la ju rakhe ia ka Khristmas da ka pyrthei Khristan lyngba ka jingngeit niam. U Jisu Khrist uba la wan long briew sha kane ka pyrthei u long u pdeng jong ka Khristmas bad khlem ma u ka jingleh burom ha kane ka sngi kam lah ban long. Kumba la kha ia u Jisu Khrist da kaba jar jar, to ngin rakhe ia ka Khistmas da kaba jar jar.
Ym shym la tip ia ka tarik ba thikna ha kaba la kha ia u Jisu Khrist. Hynrei la shim ia ka 25 tarik u December man la u snem ban rakhe pyndonburom, bad la pdiang da ki Balang Khristan. U Pope Gregory XIII u dei u ba la shim ia kane ka tarik kum ka sngi Khristmas ha ka calendar jong u. Ka pyrthei salonsar ka la pdiang ia kane.
Ki sngi ki la nang jan, sha katei ka sngi kaba khraw. Ki sur Khristmas ha ki iing ki sem, ha ki iingmane, ki kyrsiew ia ki jingmut jingpyrkhat bad ia ki mynsiem de. Ka Khristmas hi ka don bad ka wanrah ia ka khubor ka jingsuk, ka jingsuk ha ka pyrthei bad ka jingbha ha ki briew baroh. Kumta donkam ban leh adkar ha kaba rakhe ia ka.
Kyrmen ba ngin ioh ia ka Khristmas kaba suk bad ba kmen. Ngi ai khublei kyrpang ruh ia u snem Rim uba la pynlah ia ngi ba ngin khmih lynti ia uba thymmai.
Ka burom u Blei ha kiba jrong tam.
Khublei.